Me këta hapa të thjeshtë, flokët duken si nga salloni - çdo ditë Pothuajse të gjithëve na është i njohur ai ndjesi - dilni nga salloni i parukerisë me flokë në mënyrë perfekte, plot volum dhe shkëlqim. Por sapo përpiqeni ta bëni të njëjtën gjë në shtëpi, rezultati nuk duket kurrë aq i mirë. Edhe pse duket sikur floktarët kanë ndonjë “sekret”, e vërteta është se teknika e duhur përbën gjysmën e suksesit. Me pak ushtrim dhe renditje të saktë të hapave, edhe ju mund të arrini një frizurë që duket sikur sapo keni dalë nga salloni. Stilistja e njohur dhe pronare e një salloni parukerie, Rachel Vos, zbulon si të duket profesionale fenirimi në shtëpi - pa komplikime. Përgatitja e flokëve është çelësi Pas larjes, fillimisht krehni flokët me kujdes me një krehër me dhëmbë të gjerë ose me furçë të posaçme për flokë të lagur, për të shmangur këputjen. Në vend të fërkimit të fortë me peshqir, tamponojini lehtë flokët për të larguar ujin e tepërt. Ky hap është jashtëzakonisht i rëndësishëm sepse redukton elektrizimin dhe i bën flokët më të lëmuar. Para se të përdorni fenin, lërini flokët të thahen natyrshëm për disa minuta. Kjo ul ekspozimin ndaj nxehtësisë dhe ndihmon në ruajtjen e shëndetit të fijes së flokut, gjë që rekomandohet edhe nga dermatologët dhe trikologët. Ndarja e saktë e flokëve Nëse dëshironi një fenirim të njëtrajtshëm, ndarja e flokëve është e domosdoshme. Ndajini në disa seksione - pjesa e poshtme, e mesme dhe e sipërme dhe fiksojini me kapëse. Punoni në mënyrë sistematike, nga pjesa e pasme e kokës drejt majës, në mënyrë që të mos lini asnjë tufë pa trajtuar. Kjo metodë ju jep kontroll më të mirë dhe mundëson formësim më të saktë, një teknikë standarde në sallonet profesionale. Fenirimi hap pas hapi Fenirimin niseni me të ashtuquajturin “tharje të përafërt”, largoni lagështinë e tepërt duke përdorur gishtat, ndërsa rryma e ajrit drejtohet nga rrënja. Kështu krijoni bazën për volum. Kur flokët nuk janë më të lagur, merrni një furçë rrethore. Vendoseni pranë rrënjës, rrotulloni lehtë tufën drejt majave dhe ndiqni lëvizjen me fen. Fenin mbajeni gjithmonë të drejtuar poshtë, sepse kjo mbyll kutikulën e flokut, e bën sipërfaqen më të lëmuar dhe parandalon pamjen e çrregullt. Për volum shtesë dhe maja të formësuara bukur, rrotulloni furçën pak nga brenda ose nga jashtë, në varësi të efektit të dëshiruar. Pasi të përfundoni çdo tufë, përdorni ajrin e ftohtë të fenit - ai ndihmon në “fiksimin” e frizurës dhe i jep flokëve më shumë shkëlqim. Detaji përfundimtar që bën diferencën Në fund, aplikoni një llak të lehtë për flokë për të fiksuar frizurën, pa e rënduar atë. Shmangni produktet shumë të forta, të cilat mund t’i bëjnë flokët të ngurtë dhe pa lëvizshmëri. Një sasi shumë e vogël serumi ose vaji për flokë, e fërkuar më parë në pëllëmbë, aplikohet lehtë vetëm në maja. Kjo u jep flokëve shkëlqim të shëndetshëm dhe zbut fijet e imta të pabindura. Kujdes të mos e teproni, sidomos pranë rrënjës, për të mos humbur volumin. /Telegrafi/