The Cambodia Daily អ្នកឃ្លាំមើលថាប្រជាជនដែលមិនខ្វល់ខ្វាយពីការបាត់បង់ទឹកដី គឺជាប្រជាជនខ្វះទំនួលខុសត្រូវចំពោះជាតិនិងអនាគតខ្លួន
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ សរសេរលើគណនីហ្វេសប៊ុករបស់ខ្លួននៅថ្ងៃទី១៨ ធ្នូ នេះថា ប្រជាជនដែលមិនខ្វល់ខ្វាយចំពោះការបាត់បង់ទឹកដី គឺជាប្រជាជនដែលខ្វះការយល់ដឹងអំពីទំនួលខុសត្រូវចំពោះជាតិ និងអនាគតរបស់ខ្លួន។ លោក សេក សុជាតិ លើកឡើងថា ប្រជាជាតិដែលមិនផ្តល់តម្លៃដល់យុត្តិធម៌ ប្រាកដជានឹងធ្លាក់ចូលក្នុងភាពអវិជ្ជា និងភាពងងឹតនៃផ្លូវគំនិតជាមិនខាន រីឯប្រទេសដែលមិនគោរពយុត្តិធម៌សកល ក៏នឹងក្លាយជាប្រទេសដែលរងការឈឺចាប់យ៉ាងខ្លាំងដែរ នៅពេលអយុត្តិធម៌ជះពន្លឺត្រឡប់មកលើខ្លួនឯងវិញ។ អ្នកឃ្លាំមើលសង្គមរូបនេះ បញ្ជាក់ថា ប្រទេសមួយដែលមិនធ្លាប់ប្រឈមនឹងការបាត់បង់ទឹកដី អាចមិនយល់ច្បាស់ពីតម្លៃនៃការឈឺចាប់ឡើយ ចំណែកប្រទេសកម្ពុជា ចង់បានសន្តិភាព និងចង់ឱ្យប្រទេសទាំងអស់លើពិភពលោក តម្កល់យុត្តិធម៌សកលជាមូលដ្ឋានគ្រឹះនៃការរស់នៅរួមគ្នារបស់មនុស្សជាតិ។ សង្គ្រាមកម្ពុជា-ថៃ លើកទី២ នេះ បានអូសបន្លាយពេលអស់ចំនួន ១២ថ្ងៃហើយ ខណៈពលរដ្ឋខ្មែរដែលរស់នៅតាមបណ្តាប្រទេសផ្សេងៗ បានចេញធ្វើបាតុកម្មប្រឆាំងថៃ ជាបន្តបន្ទាប់។ ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី១៨ ធ្នូ នេះថា សង្គ្រាមរយៈពេល ១២ថ្ងៃនេះ យោធាថៃ បានប្រើប្រាស់សព្វាវុធធុនធ្ងន់គ្រប់ប្រភេទដែលមានសមត្ថភាពបំផ្លាញខ្ពស់ ដើម្បីប្រហារមកលើកម្ពុជា រួមមានយន្តហោះចម្បាំង F-16 រថយន្តបាញ់រ៉ុក្កែត DTI-2 ដ្រូនទម្លាក់គ្រាប់បែក យន្តហោះបាញ់ផ្សែងពុល គ្រាប់បែកចង្កោម និងការដាក់ពង្រាយទាហានយ៉ាងច្រើនលើសលប់ក្នុងការឈ្លានពានទឹកដីកម្ពុជា៕ © […] The post អ្នកឃ្លាំមើលថាប្រជាជនដែលមិនខ្វល់ខ្វាយពីការបាត់បង់ទឹកដី គឺជាប្រជាជនខ្វះទំនួលខុសត្រូវចំពោះជាតិនិងអនាគតខ្លួន appeared first on The Cambodia Daily Khmer .