Годишната прес-конференција за медиумите на рускиот претседател Владимир Путин траеше 4,5 часа, при што тој одговараше и на претходно избрани прашања, телефонски јавувања и пораки од граѓаните, кои беа прикажувани на голем екран. Кремљ соопшти дека добил 2,6 милиони прашања, а прес-конференцијата ја претстави како демонстрација на отвореноста на Путин и неговата грижа за граѓаните. Путин најмногу се осврна на војната во Украина, на односите на Русија со Западот и со ЕУ, санкциите, економијата. Но, тој одговараше и на бизарни, на лични прашања и пораки од граѓаните. Граѓаните се жалеа на прекините на интернетот, на водата за пиење, на високите животни трошоци и на лошите јавни услуги. Делот на кој Путин одговараше на прашања на граѓаните беше наречена „директна линија“, а во една од пораките беше наведено дека тоа е „циркус, а не директна линија“. Во една од пораките беше поставено прашањето зошто обичните Руси се во полоша состојба од луѓето во Папуа Нова Гвинеја. Путин беше прашан дали е вљубен, а тој позитивно одговори, како и на прашањето дали понекогаш тајно се вози низ Москва за да разбере што се случува во Русија. Рускиот претседател беше прашан и дали има вистински пријател. Според РИА Новости, Путин одговорил – „мораме да разбереме што е вистинско пријателство, тоа е целосно несебично. Луѓето околу Путин воздржано и достоинствено се однесуваат, а тој не се срами од нив“. Студентот Кирил Бажанов (23) ја запроси својата девојка Олга, тврдејќи оти таа ја гледа прес-конференцијата на телевизија. Бажанов го покани Путин на свадба, а потоа го праша за финансиската поддршка за младите семејства. (МИА)