Од јануари 2026 година, во Германија ќе има задолжителна воена служба, а сите мажи на одредена возраст мора да пополнат прашалник од германските вооружени сили (Бундесвер) и да се подложат на лекарски преглед, а оние кои ќе се обидат да го избегнат ќе се соочат со казна од 1.000 евра или принудна регрутација. Во прашалникот на Бундесверот се одговара на 14 прашања со цел да се процени кој е погоден и кој е заинтересиран за приклучување, пишува Билд и додава дека можат да аплицираат и жени. Министерството за одбрана потврди за весникот дека секој што не одговара или одговара неточно, и покрај повторените барања, се соочува со казна според Законот за административни прекршоци, која може да биде до 1.000 евра, во зависност од сериозноста на прекршокот. Од јули 2027 година, испитот ќе биде задолжителен за сите мажи, а секој што нема да се појави на лекарскиот преглед ќе се соочи со последици, вклучително и однесен во центар за регрутација со полициска придружба. „Доколку регрутот не се појави на испитот за регрутација без основана причина, од полицијата може да се побара да го приведе“, објави Министерството. Планирано е првите прашалници да бидат испратени кон средината на јануари, а како што е наведено, писмата ќе бидат испраќани еднаш неделно. Министерството за одбрана очекува Бундесверот секој месец да контактира околу 54.000 млади лица. Министерот за одбрана Борис Писториус изјави дека целта е да се модернизираат вооружените сили со нов систем за регрутирање и верува дека на овој начин Бундесверот ќе порасне од сегашните 183.000 на 270.000 војници до 2035 година.