Lífsstílsgúrúinn Martha Stewart hefur keypt hlut í enska meistaradeildarliðinu Swansea. Stewart er þannig orðin minnihlutaeigandi í velska liðinu og slæst þar í hóp með rapparanum Snoop Dogg og króatíska fótboltamanninum Luka Modrić. Martha Stewart er 84 ára gömul viðskipta- og sjónvarpskona, rithöfundur og milljarðamæringur. Hún var viðstödd sigur Swansea í leik gegn Wrexham á föstudaginn. „Martha er náin vinkona Snoop Dogg og hún kom á Wrexham-leikinn sem gestur okkar,“ er haft eftir Brett Cravatt og Jason Cohen, aðaleigendum Swansea, í frétt AFP.„En það er okkur sönn ánægja að staðfesta að Martha, sem hefur byggt upp langan og farsælan feril sem fremsti sérfræðingur Bandaríkjanna í heimilishaldi og lífsstíl, hefur fylgt í fótspor Snoop og Luka Modrić og orðið minnihlutaeigandi í knattspyrnufélaginu okkar.“ Markmið Swansea er að gera félagið sýnilegra og auka tekjur til að geta eytt meira fé í nýja leikmenn. Fyrrum stjarna Real Madrid, Luka Modrić, sem nú spilar með AC Milan, fjárfesti í Swansea í apríl. Rapparinn Snoop Dogg gerði slíkt hið sama í júlí.