Yfirvöld í Bandaríkjunum hafa uppgötvað yfir milljón skjöl til viðbótar sem gætu tengst kynferðisbrotamanninum Jeffrey Epstein. Til stendur að birta skjölin á næstu dögum og vikum. Alríkislögreglan FBI og saksóknarar í New York greindu dómsmálaráðuneytinu frá þessu. Í yfirlýsingu frá dómsmálaráðuneytinu vegna þessa segir að unnið sé dag og nótt við að fara yfir skjölin og strika yfir það sem er nauðsynlegt samkvæmt lögum um vernd brotaþola. Ráðuneytið muni birta skjölin eins fljótt og auðið er, en það gæti tekið nokkrar vikur. Dómsmálaráðuneytið hefur verið undir smásjá eftir að hafa ekki birt öll Epstein-skjölin fyrir 19. desember, sem er fresturinn sem kveðið er á um í í lögum sem Donald Trump Bandaríkjaforseti undirritaði.