Þorgerður Katrín Gunnarsdóttir utanríkisráðherra og formaður Viðreisnar var gestur okkar Mannlega þáttarins á aðfangadagsmorgunn þar sem hún ræddi við Guðrúnu Gunnarsdóttur og Gunnar Hansson um jólin og hátíðirnar. Hún rifjaði upp jólahefðir á æskuheimilinu sem margar eru enn mikilvægar á hennar heimili í dag. „Þegar kemur að hefðum get ég verið óttalegt íhald segja sumir mér í fjölskyldunni,“ segir hún kímin. Tínir ber fyrir rjúpuna og geymir fram í desember Á aðfangadagskvöld er rjúpa á borðum fjölskyldunnar sem eiginmaður Þorgerðar, Kristján Arason skýtur hana gjarnan sjálfur. Á Þorláksmessu byrjar Þorgerður að steikja beinin og hjörtun og leyfir því svo að malla yfir nóttina. „Svo kveiki ég aftur undir svo sósan verður sterk með þessum bláberjum sem ég týni sérstaklega fyrir rjúpnasósuna. Geymi eitt box fram í desember,“ segir hún. Fóru í stórkostlegar skötuveislur til Kaju Lagt er á borð á heimilinu á Þorláksmessu. Áður var hefð að gera það þegar komið var heim úr skötuveislu hjá systur Þorgerðar heitinni, Karitas H. Gunnarsdóttur eða Kaju eins og hún var kölluð. Eftir að hún lést borðar fjölskyldan hins vegar ekki lengur skötu á Þorláksmessu. „Hún var alltaf með stórkostlega skötuveislu og ég miðaði alltaf við að vera búin að kaupa allt og pakka og gera allt því það var svo notaleg stund," segir hún. „En nú vinnur maður út frá raunveruleikanum í dag.“ Skrýtin jól án gömlu fjölskyldunnar Þorgerður ver hátíðinni með eiginmanni á börnum en eftir að móðir hennar, Katrín Arason, lést á þessu ári eru allir úr hennar uppeldisfjölskyldu látin. Faðir hennar Gunnar Eyjólfsson leikari lést 2016 en systir hennar Kaja 2022. Það eru mikil viðbrigði að vera án þeirra allra. „Þetta eru fyrstu jólin án minnar gömlu fjölskyldu,“ segir Þorgerður. „Þetta verður skrýtið.“ Hlupu inn rétt fyrir sex til að smakka sósuna Kaja og foreldrarnir voru vön því að koma á aðfangadag og verja kvöldinu með Þorgerði og fjölskyldu. Þá var mikilvægt að smakka bláberjasósuna til. „Þau komu inn rétt fyrir sex og varla heilsuðu heldur fóru beint að rjúpusósunni, tók sitthvora skeiðina og fóru að sötra," segir Þorgerður og brosir. Hún bað þau venjulega að klára ekki sósuna fyrir matinn en það þurfti að bragða á henni enda mikill metnaður lagður í hana. „Það þurfti að smakka og veita mér leiðsögn eða segja: Núna toppaðirðu þig.“ Jesú leggst í jötuna á slaginu sex Fjölskyldan er kaþólsk enda Þorgerður alin upp í trúnni af föður sínum Gunnari. Á aðfangadagskvöld lesa þau jólaguðspjallið klukkan sex og svo er Jesúbarnið sjálft lagt í jötu þegar klukkurnar hringja. „Við keyptum úti á Spáni við Kristján, fjárhús með Jósep, Maríu, Jesú og fjárhirðum og vitringum. Ofan á píanóinu erum við með fjárhúsið en enn er Jesú ekki kominn í jötuna. Hann birtist klukkan sex eftir jólaguðspjallið,“ segir Þorgerður. Svo hefjast jólin þegar dóttir þeirra hefur hringt þau inn. „Svo hringir Katrín Erla bjöllunni og þá eru jólin komin.“ Trúuð og ekki fimin við að viðurkenna það Sem fyrr segir var fjölskyldufaðirinn á heimilinu kaþólskur en móðir Þorgerðar var ekki í trúfélagi. En dæturnar tvær fylgdu föður sínum í trúnni samkvæmt samkomulagi sem foreldrarnir gerðu við prest þegar þau giftu sig í kaþólskri kirkju í New York. „Ég er trúuð og ekki feimin við að viðurkenna það þó ég sé liberalisti innan minnar kirkju. En ég er óskaplega ánægð með nýja páfann eins og ég var með Franz.“ Hún sækir ekki miðnæturmessu í Landakotskirkju eins og hún gerði á meðan fólkið hennar lifði en hún fer stundum í kirkju. „Ég fer meira í kirkju þegar ég er í útlöndum. Kveiki á kertum og það er gott að fara af og til með Maríubænina,“ segir hún. En á Íslandi koma stundir þar sem henni þykir nauðsynlegt að komast í kirkjuna. Þá þarf ekki að vera messa því hún vill stundum eiga þar stund með sjálfri sér. „Ég fer stundum úr vinnunni, sting mér inn í kirkju og sit þar í 10-15 mínútur. Það er rosa gott.“ Jólin stundum lituð af jólafrumsýningunni Jólin á æskuheimilinu lituðust gjarnan af leikhúslífinu. „Ef pabbi var í jólafrumsýningunni annan í jólum þá var hann greinilega með hugann við það, rosalega fókuseraður og einbeittur. Sérstaklega ef hann var í aðalhlutverkum sem hann var mjög gjarnan.“ En jólin fóru fram á sinn hátt, móðir hennar gerði rjúpurnar á meðan leikarinn rifjaði upp línurnar og hrósaði henni fyrir matseldina. „Og pabbi var að skottast í kringum hana, segja hvað allt væri æðislegt og að fara með sögur.“ Jólin kalla minningarnar fram Hún viðurkennir fúslega að sakna fjölskyldunnar og það er erfitt að vera án þeirra allra. „Ég er búin að gráta svolítið núna þegar maður er að gera hitt og þennan mánuðinn,“ segir hún. En hún yljar sér við minningarnar um samheldna fjölskyldu. „Það er fyrst og fremst bara þakklæti. Við vorum svo þétt fjölskylda. Kaja var svo stór partur af mínu lífi og jólin kalla þetta fram.“ „Þetta eru fyrstu jólin án minnar gömlu fjölskyldu," segir Þorgerður Katrín Gunnarsdóttir. Eftir að móðir hennar lést á þessu ári er æskufjölskyldan öll farin. Minningarnar fylla hana miklu þakklæti og fjölskyldan heldur í hefðir.