„Þetta er bara eins og Jesúbarnið,“ sagði nýbakaður faðir sem vissi ekki að von væri á nýjum erfingja. Móðirin vissi það ekki heldur fyrr en hún var komin af stað í fæðingu og því hljóta þau titilinn óvænt ársins 2025. Fjölskyldan var í vetrarfríi í Skagafirði og var á heimleið á mánudegi. Þegar þau komu heim fékk Guðfinna smá verki og ákvað að leggja sig. Klukkan tvö um nótt vaknar Andri svo við umgang. Þá er Guðfinna frammi á gólfi og ákveða þau að keyra upp á spítala. Þegar komið var á spítalann tóku ljósmæðurnar undrandi á móti þeim og vissu ekki hvað væri að gerast, rétt eins og Guðfinna og Andri. Á meðan þau biðu eftir fæðingarlækni setti ljósmóðirin hlustunarpípu á magann og heyrði tvo hjartslætti. Þá varð ljóst að einhver bumbubúi var á ferð.