Rafmagnslaust hefur verið í norðanverðum Dýrafirði síðan skömmu eftir miðnætti vegna bilunar á Gerðhamralínu. Ekkert verður af guðsþjónustu í Mýrarkirkju á jóladag, og er það allavega þriðja árið í röð sem það gerist. „Okkur er farið að lengja eftir jólamessu á Mýrum,“ segir Hildur Inga Rúnarsdóttir, prestur í Mýrarkirkju. Hildur segir að síðustu tvö ár hafi verið ófært vegna snjós og raunar mjög oft síðustu ár. „Loksins átti að vera fært fyrir snjó og þá gerist þetta,“ segir Hildur. Guðsþjónusta átti að hefjast klukkan 13. Samkvæmt upplýsingum frá Orkubúi Vestfjarða hefur bilanagreining staðið yfir á raflínunni síðan í nótt. Hildur segir að ákveðið hafi verið klukkan 9 í morgun að aflýsa messunni því kirkjan sé orðin svo köld. Hún hvetur þá sem hugðust sækja messu til að sækja helgihald annars staðar í Ísafjarðarprestakalli.