Starfsmenn Orkubús Vestfjarða vinna hörðum höndum að því koma rafmagni á norðanverðan Dýrafjörð eftir að rafstrengur fór í sundur í nótt. Verkstjóri segir menn hafa stokkið til og telur það ekki eftir sér að fresta jólaboði til morguns. Hátt í tíu sveitabæir í Dýrafirði hafa verið án rafmagns síðan á öðrum tímanum á jólanótt. Starfsmenn frá Orkubúi Vestfjarða voru ræstir í bilanaleit um leið. Hjörtur Traustason, verkstjóri hjá orkubúinu, segir að þeir hafi verið komnir af stað upp úr tvö þegar búið var að hringja út mannskap. „Það eru náttúrulega menn í fríi, jólafríi. En þeir eru bara svo duglegir þessir strákar. Þeir henda öllu frá sér, þegar þetta er sérstaklega svona. Það er leiðinlegt að missa rafmagnið, en á jólunum, það er alveg glatað,“ segir Hjörtur. Rafmagnsleysið olli því meðal annars að ekkert varð af guðsþjónustu í Mýrarkirkju á jóladag, þar sem kirkjan var orðin mjög köld og hvorki hægt að kveikja ljós né á hljóðfærum. Eftir nokkurra klukkustunda leit kom í ljós að strengur hafði farið í sundur í miklum leysingum í Hjarðardalsá. Lítið var hægt að gera í morgunsárið vegna vonskuveðurs og mikils vatnsmagns í ánni og menn fengu því að fara heim að leggja sig í nokkra tíma. Ekkert verra að éta jólasteikina á morgun Staðan var tekin aftur skömmu fyrir hádegi og nú vinna níu manns að því að koma á bráðabirgðalausn sem vonandi dugar fram yfir áramót. „Nú erum við búin að setja niður staura sitthvoru megin við bakkann. Við ætlum að leggja línu hérna þvert yfir, svo hengjum við strenginn á línuna og tengjum hann saman hérna sitthvoru megin við bakkann,“ segir Hjörtur. Eruð þið búnir að missa af öllum jóladagsboðunum? „Ég er búinn að allavega afboða mitt, ég ætlaði að vera með fólk í mat hjá mér en ég er búinn að slaufa því. Það verður bara á morgun. Það er ekkert að því að éta jólasteikina á annan í jólum. Þetta er líka bara vinnan okkar og við þurfum alltaf að gera ráð fyrir svona. Það er enginn skipaður til að koma en það voru allir tilbúnir að koma og hjálpa.“