Starfsmenn Orkubús Vestfjarða eru búnir að koma á rafmagni á Dýrafirði á ný. Rafmagnslaust varð á hátt í tíu sveitabæjum eftir að rafstrengur fór í sundur í Hjarðadalsá á jólanótt. Rafmagnsleysið olli því meðal annars að ekkert varð af guðsþjónustu í Mýrarkirkju á jóladag, þar sem kirkjan var orðin mjög köld og hvorki hægt að kveikja ljós né á hljóðfærum. Hjörtur Traustason, verkstjóri hjá Orkubúinu, segir að rafmagn hafi komist um tuttugu mínútur eftir miðnætti. Hann segir starfið hafa verið krefjandi vegna mikillar rigningar og að margir bílar hafi staðið fastir. Um það bil sólarhring tók að koma rafmagninu aftur á. Starfsmenn orkubúsins fórnuðu margir hverjir jólaboðum til að gera við rafstrenginn en Hjörtur segir það bestu jólagjöfina að vera búinn að koma honum í lag.