Neyðin getur kallað hvenær sem er, í vitlausu veðri og jafnvel á heilögustu stund. Landinn hitti tvo félaga í björgunarsveitum sem hafa farið í krefjandi útköll um hátíðarnar. Anna Filbert, í Kili á Kjalanesi og Guðjón Örn Sigtryggsson í Þorbirni í Grindavík, hugsuðu sig ekki tvisvar um og svöruðu kallinu um jólin. Anna, sem byrjaði seint í björgunarsveit, rauk í útkall þegar þau hjónin og börnin fimm voru í þann mund að byrja að opna gjafirnar. Elsta dóttir þeirra var þá nýbyrjuð í björgunarsveitinni. Anna brást skjótt við. „Við ætluðum að gefa henni björgunarsveitarjakka en hún vissi það auðvitað ekki, svo ég óð undir tréð og rótaði í pökkunum. Að lokum kastaði ég pakkanum í hana og sagði: Við erum að fara!“ Mæðgurnar skunduðu á mótsstað björgunarsveitarinnar og mætingin var óvenju góð þrátt fyrir aðstæðum, fólk var í sparifötunum undir göllunum. Guðjón Örn sótti barnshafandi konu til Grindavíkur í snarvitlausu veðri og kom henni á fæðingardeildina í Reykjavík. Reykjanesskaginn var allur kolófær og fastir bílar út um allt. Veðrinu hafði ekki slotað daginn eftir og Guðjóni var falið foreldrana nýbökuðu og soninn á fæðingardeildina og koma þeim heim til Grindavíkur. Bíllinn braust í gegnum skaflana með tilheyrandi hnykkjum og vélargný og ekki heyrðist tíst í barninu. Guðjón er sannfærður um að þarna hafi fæðst verðandi félagi í björgunarsveitinni Þorbirni í Grindavík og ætlar að mæta með gallann til drengsins þegar hann hefur aldur til. Björgunarsveitarfólkið Anna Filbert og Guðjón Örn Sigtyryggsson hugsuðu sig ekki tvisvar um og hlýddu útkalli um hátíðarnar. Anna Filbert og Guðjón Örn Sigtryggsson sögðu frá björgunarsveitarútköllum á heilögum stundum í Jólalandanum á Rás 1. Þátturinn er í spilaranum hér fyrir ofan.