रौतहटको कटहरिया नगरपालिका–९ स्थित ज्योति डिस्टिलरीको ब्वाइलर (एक प्रकाशको मशिन) विस्फोट हुँदा एक जनाको मृत्यु भएको छ भने अन्य छ जना कामदार घाइते भएका छन् । जिल्ला प्रहरी कार्यालयका प्रहरी नायब उपरीक्षक विष्णु बस्यालका अनुसार आज बिहान भएको ब्वाइलर विस्फोटमा सोही नगरपालिका–९ बलुवाका ४५ वर्षीय लक्ष्मण यादवको घटनास्थलमा नै मृत्यु भएको हो । सबै घाइतेका हातखुट्टा जलेका छन् । उनीहरूलाई उपचारका निम्ति वीरगञ्ज पठाइएको छ । विस्फोटनको कारण स्पष्ट भएको छैन । प्रहरी अनुसन्धान जारी छ । रासस