Fólk sem fer af landi brott yfir hátíðarnar þarf jafnan að skilja gæludýrin eftir. Á hundahóteli í Hörgársveit fer vel um loðna gesti og engar áhyggjur þarf að hafa af sprengjulátum. „Það er ekkert skotið upp hérna í sveitinni,“ segir Óskar Harðarson, hundahótelstjóri. Óskar segir mikilvægt að eigendur fái að fylgjast náið með sínu dýri og líðan þess meðan á dvölinni stendur. „Þess vegna sendi ég alltaf á morgnana þegar þau fara út í leik. Þá tek ég myndband af hundunum sem eru úti og sendi á fólkið þannig að það sjái hvernig aðstæðurnar eru.“ Eftir dekur um jólin geta hundarnir svo dvalið í ró og næði í sveitinni fjarri sprengingum og látum á meðan nýtt ár gengur í garð. „Það eru sumir sem eru að koma hérna yfir áramótin bara út af flugeldum sko. Bara til að komast í rólegheitin.“