Pétur Marteinsson rekstrarstjóri og fyrrverandi atvinnumaður í knattspyrnu hefur fengið hvatningu frá fjölda Samfylkingarfólks til að gefa kost á sér í oddvitasæti Samfylkingarinnar í Reykjavík í sveitarstjórnarkosningunum í vor. Heiða Björg Hilmisdóttir borgarstjóri hefur ein lýst því yfir að hún vilji leiða flokkinn í borginni, en heimildir fréttastofu herma að leit hafi staðið yfir, bæði leynt og ljóst, að frambjóðanda sem gæti skorað hana á hólm. Fram kom í Speglinum fyrir nokkru að nokkuð sé síðan fólk með tengingar við forystu flokksins hafi farið að kanna hjá ýmsu nafntoguðu fólki hvort það hefði áhuga á að fara fyrir flokknum í komandi sveitastjórnarkosningum. Tæpur mánuður er í prófkjör Samfylkingarinnar í Reykjavík sem verður 24. janúar og niðurstaðan verður bindandi fyrir sex efstu sætin en uppstillingarnefnd raðar í önnur sæti. Frestur til að skila inn framboði rennur út 3. janúar og flokksmenn einir hafa atkvæðisrétt. Í samtali við fréttastofu segir Pétur að undanfarnar vikur hafi honum borist fjöldi áskorana frá Samfylkingarfólki í Reykjavík og víðar um að gefa kost á sér til að leiða listann. Hann segist ekki hafa tekið ákvörðun, en „liggi undir feldi“. Pétur hefur ekki komið að starfi flokksins áður, en hefur látið sig skipulagsmál talsvert varða, m.a. í störfum sínum fyrir Borgarbrag sem starfaði meðal annars fyrir KSÍ og Reykjavíkurborg.