RFI ខេមរភាសា លោក គង់ ពុទ្ធិការ៖ ប្រាសាទព្រះវិហាររងការខូចខាតធ្ងន់ធ្ងរ ដោយសារទង្វើទ័ពថៃ
ក្នុងសង្គ្រាមរយៈពេល ២០ថ្ងៃជាមួយកម្ពុជា យោធាថៃបានបើកការវាយប្រហារមិនរើសមុខចូលដែនអធិបតេយ្យរបស់កម្ពុជា ក្នុងនោះក៏រួមមានការវាយកម្ទេចប្រាសាទព្រះវិហារដែលជាប្រាសាទបុរាណខ្មែរ និងជាសម្បត្តិរបស់មនុស្សជាតិផងដែរ។ លោក គង់ ពុទ្ធិការ អគ្គនាយកនៃអាជ្ញាធរជាតិព្រះវិហារបានប្រាប់វិទ្យុបារាំងអន្តរជាតិ RFI នៅព្រឹកថ្ងៃអាទិត្យ ទី២៨ធ្នូនេះថា បើទោះបីជាបទឈប់បាញ់បានចាប់អនុវត្តតាំងពីម៉ោង១២ ថ្ងៃត្រង់ម្សិលមិញក៏ដោយ ក៏មកទល់ពេលនេះមន្ត្រីនៃអាជ្ញាធរជាតិព្រះវិហារមិនអាចចុះទៅពិនិត្យទីតាំងផ្ទាល់ ដើម្បីកត់ត្រាទំហំនៃការខូចខាតរបស់ប្រាសាទបុរាណខ្មែរនេះបាននៅឡើយ។ ក៏ប៉ុន្តែ លោក គង់ ពុទ្ធិការ បញ្ជាក់ថា ក្រោយសង្គ្រាមលើកទី២នេះ ប្រាសាទព្រះវិហាររងនូវការខូចខាតធ្ងន់ធ្ងរជាងសង្គ្រាមខ្មែរ-ថៃរយៈពេល ៥ថ្ងៃកាលពីខែកក្កដា។