Киев прави сè за да ја заврши војната со Русија, но конечното обезбедување на мирот ќе зависи од неговите партнери, изјави денеска украинскиот претседател Володимир Зеленски. „Ова се најактивните дипломатски денови во годината и многу работи можат да се решат пред Нова Година. Правиме сè за да се случи тоа. Но, одлуката зависи од партнерите“, напиша Зеленски на својот профил на платформата Телеграм. Тој додаде дека украинските партнери треба да го зголемат притисокот врз Москва, за Русија „да ги почувствува последиците од агресијата“. Зеленски подоцна денеска ќе се сретне со американскиот претседател Доналд Трамп во неговата вила во Флорида. Средбата е закажана за 13 часот по локално време, односно 19 часот по средноевропско време. Зеленски претходно објави дека за време на состанокот во резиденцијата на Трамп во Флорида, ќе разговараат за судбината на спорниот регион Донбас, како и за иднината на нуклеарната централа Запорожје. Зеленски, кој синоќа пристигна во Флорида, рече дека сè уште се надева дека ќе го модерира американскиот предлог за целосно повлекување на украинските сили од Донбас. Во случај на неуспех, целиот план од 20 точки треба да се стави на гласање како дел од референдум, а за да се овозможи тоа гласање, Русија треба да се согласи на 60-дневно примирје, објави Аксиос.