Alls sóttu um 1500 heimili um hjálp frá Mæðrastyrksnefnd fyrir þessi jól. Anna H. Pétursdóttir, formaður nefndarinnar, segir þetta ívið lægra en á síðasta ári en aðsókn hafi verið mjög svipuð. Stærsta úthlutun fór fram 16. og 17. desember en Anna segir fólk enn vera að hafa samband til að fá styrki yfir hátíðirnar. „Við vorum fram á síðasta dag að úthluta. Það eru margir sem gleyma sér,“ segir Anna. Sem dæmi nefnir hún einnig að ráðist hafi verið í úthlutun þann 22. desember eftir að Mæðrastyrksnefnd hafi borist 100 kassar af hamborgarhryggjum frá fyrirtækinu Eldum rétt. „Það eru náttúrulega ofsalega margir sem hafa verið rausnarlegir við okkur, bæði fyrirtæki og einstaklingar,“ segir hún. Anna segir að eitthvað hafi verið um símtöl til nefndarinnar frá fólki sem taldi hana vera að hætta störfum. Bæði hafi símtöl borist frá fólki sem hugðist sækja um styrk en einnig öðrum sem hugðust styrkja nefndina sjálfa. Mögulega hafi það verið þar sem Fjölskylduhjálp hætti starfsemi fyrr á árinu. „Það er nú ekki svoleiðis að við séum að fara að hætta þar sem við höfum verið að störfum frá því árið 1928 og það hefur ekki staðið til að leggja niður Mæðrastyrksnefnd,“ segir hún. Anna segir að úthlutunum sé lokið en alltaf sé eitthvað til af mat ef fólk lendir í neyð. „Fólk er að hafa samband við okkur enn þá,“ segir Anna. „Sem er bara eðlilegt og þá hjálpum við fólki ef við getum það.“