Kristrún Frostadóttir forsætisráðherra segir skiljanlegt að spurningar vakni við að einn og sami ráðherrann fari með málefni þriggja ráðuneyta, eins og í tilfelli Ingu Sæland sem er með öll ráðuneyti Flokks fólksins á sinni könnu - en það sé nú aðeins í skamman tíma. Inga, formaður flokksins og félags- og húsnæðismálaráðherra, fer með málefni allra þriggja ráðuneyta flokksins í fjarveru Eyjólfs Ármannssonar innviðaráðherra og Guðmundar Inga Kristinssonar mennta- og barnamálaráðherra. Fyrir ríkisráðsfund á Bessastöðum í dag var Kristrún spurð hvort þessi tilhögun væri eðlileg. Hún segir eðlilegt að innviðaráðherra sé frá í nokkrar vikur vegna fæðingar barns síns. Hann komi aftur um mánaðarmót janúar/febrúar. „En ég veit ekki nákvæmlega stöðuna á mennta- og barnamálaráðherra. Hann er tiltölulega nýútskrifaður af sjúkrahúsi og svo þurfum við bara að taka stöðuna á næstu dögum.“ Hvað er ásættanlegur tími í svona fjarveru? „Ég er ekki með neina uppskrift að því. Auðvitað gerast hlutir í lífinu, líka hjá ráðherrum. Við þurfum að hafa sveigjanleika til að bregðast við því. En ég skil að fólk sé með þessar spurningar, það þarf að vera ákveðin festa í ríkisstjórninni. Þetta er bara eitthvað sem við munum komast betur að núna á allra næstu dögum.“ Forsætisráðherra segir félags- og húsnæðismálaráðherra einungis fara með málefni þriggja ráðherra í skamma stund. Annað væri óeðlilegt. Innviðaráðherra snúi til baka í næsta mánuði en óljóst sé hversu lengi mennta- og barnamálaráðherra verði frá.