RFI ខេមរភាសា អ៊ីស្រាអែលផ្តើមបំផ្លាញផ្ទះសម្បែងរបស់ប្រជាជនប៉ាឡេស្ទីន នៅដែនដីស៊ីហ្សកដានី
អង្គការសហប្រជាជាតិ កាលពីថ្ងៃពុធទី ៣១ធ្នូបានបរិហារថ្កោលទោសចំណាត់ការរបស់អ៊ីស្រាអែលដែលបានសម្រេចហាមឃាត់មិនឲ្យអង្គការអន្តរជាតិចំនួន៣៧ អាចនាំយកជំនួយមនុស្សធម៌ចូលទៅក្នុងទឹកដីហ្កាហ្សា ចាប់ពីខែមករាឆ្នាំថ្មី។ ក្នុងទឹកដីស៊ីហ្សកដានីឯណោះវិញ នៅជំរំជនភៀសខ្លួនប៉ាឡេស្ទីន អ៊ីស្រាអែលនៅតែមិនអនុគ្រោះដល់ប្រជាជនប៉ាឡេស្ទីន សូម្បីតែនៅថ្ងៃឆ្លងចូលឆ្នាំថ្មី។ នៅថ្ងៃពុធទី៣១ធ្នូ ដែលជាថ្ងៃចុងក្រោយនៃឆ្នាំ២០២៥ កងទ័ពអ៊ីស្រាអែលបានបញ្ជូនម៉ាស៊ីន ឡានឲ្យទៅចូកបំផ្លាញផ្ទះសម្បែងរបស់ប្រជាជនប៉ាឡេស្ទីនចំនួន២៥អគារ ស្ថិតក្នុងជំរំជនភៀសខ្លួន Nur Shams ក្បែរតំបន់អាណានិគមកិច្ចអ៊ីស្រាអែល ក្នុងទឹកដីស៊ីហ្សកដានីរបស់ប៉ាឡេស្ទីន។