Hæðasvæðið yfir og suður af Grænlandi stjórnar veðrinu áfram næstu daga með hægum vindum og björtu veðri víða um land fram á þriðjudag. Þó munu lægðir austur af landinu valda strekkingsvindi og dálitlum éljum um norðan- og einkum austanvert landið fram á laugardag, að því er segir i hugleiðingum veðurfræðings. Breytingar verða á miðvikudag þegar lægðadrag nálgast landið úr suðvestri. Þá ætti að bæta í vind og úrkomu um vestanvert landið. Yfirleitt verður frost 2 til 12 stig, kaldast inn til landsins. Frost gæti náð 19 stigum á Kárahnjúkum. Á sunnudag er útlit fyrir að það hlýni örlítið um landið vestanvert, einkum við ströndina, og svo aftur á miðvikudag. Þau hlýindi stoppa þó líklega stutt við.