Bandaríkjaher gerði loftárásir á Venesúela í morgun og handsamaði forseta landsins, Nicolas Maduro og eiginkonu hans, og fluttu þau úr landi. Stjórnvöld í Venesúela segja að árásunum hafi bæði verið beint að borgaralegum og hernaðarlegum skotmörkum. Spenna milli ríkjanna hefur aukist síðustu mánuði og hefur Donald Trump Bandaríkjaforseti sakað Maduro um að standa að fíkniefnainnflutningi til Bandaríkjanna. Delcy Rodríguez varaforseti Venesúela ávarpaði venesúelsku þjóðina í ríkissjónvarpi landsins og kvaðst ekki vita hvar Maduro og eiginkona hans væru niðurkomin og krafðist sannana um að þau væru á lífi. Trump hefur boðað til blaðamannafundar við Mar-a-Lago í Flórída klukkan 16 á íslenskum tíma í dag. Fregnir bárust af sprengingum í Venesúela snemma í morgun. Bandaríkin gerðu árásir á minnst sjö stöðum í morgun en BBC hefur staðfest að árásir hafi meðal annars verið gerðar á La Carlota herflugstöðinni, Port La Guaira höfnina og Higuerote flugvöllin. Ekki liggur fyrir hvort og þá hversu margir létust í árásunum eða hversu umfangsmikið tjón á innviðum er. Búast ekki við frekari árásum Maduro lýsti yfir neyðarástandi vegna árásanna í morgun, en í fyrstu voru það ónafngreindir embættismenn í Bandaríkjunum sem staðfestu að Bandaríkin stæðu að baki árásanna en forsetinn staðafesti það sjálfur á samfélagsmiðli sínum. Mike Lee, öldungadeildarþingmaður Repúblikanaflokksins fyrir Utah, sagði Marco Rubio utanríkisráðherra Bandaríkjanna hafi tjáð sér að hann geri ekki ráð fyrir frekari aðgerðum í Venesúela nú þegar Maduro forseti hefur verið tekinn höndum. Í færslu á X sagðist Lee hafa rætt við Rubio í síma sem hafi sagt honum að Maduro hafi verið handtekinn og verði sóttur til saka fyrir dómstólum í Bandaríkjunum. Loftárásirnar hafi verið gerðar í því skyni að vernda þá sem handtóku forsetann. Á ýmsu gengið milli Bandaríkjanna og Venesúela Á ýmsu hefur gengið milli Bandaríkjanna og Venesúela að undanförnu og spennan aukist milli forsetanna. Trump hefur sakað ríkisstjórn Venesúela um innflutning á glæpastarfsemi og fíkniefnum til Bandaríkjanna. Bandaríkin hafa stöðvað siglingar olíuflutningaskipa til og frá landinu og bandaríska leyniþjónustan CIA gerði drónaárás á höfn í Venesúela. Trump hefur sakað Maduro um að nota olíupeninga til að fjármagna fíkniefnastarfsemi í Bandaríkjunum og „tæma fangelsi og geðsjúkrahús“ Venesúela til að senda vistmenn þeirra til Bandaríkjanna. Bandaríkin gert 30 árásir á það sem þau kalla fíkniefnasmyglskip, í Kyrrahafinu og Karíbahafinu og fleiri en 110 manns hafa látið lífið frá fyrstu árásinni þann 2. september. Maduro hefur sakað Bandaríkin um að kynda undir tilraunum til valdaráns og að vilja ná olíuauðlindum landsins. Í Venesúela eru mestu olíuauðlindir í heimi, sem vitað er um og margir sérfræðingar telja árásir síðustu mánaða vera lið í áætlun Bandaríkjastjórnar um að endurvekja yfirráð sín í þessum heimshluta, en Venesúela hefur síðustu ár eflt tengsl við ríki eins og Kína, Íran og Rússland.