Hæstiréttur Venesúela skipaði varaforseta landsins, Delcy Rodríguez, á laugardagskvöld að taka við völdum um stundarsakir á meðan Nicolás Maduro forseti er fjarverandi. Bandarískir hermenn námu Maduro á brott ásamt eiginkonu hans fyrr um daginn eftir að hafa gert sprengjuárásir víðs vegar um landið. Hann hefur verið fluttur til New York, þar sem Bandaríkjamenn hyggjast rétta yfir honum fyrir „eiturlyfjahryðjuverk“. Dómstóllinn komst að þeirri niðurstöðu að Rodríguez yrði „taka að sér og fara með, til bráðabirgða, alla eiginleika, skyldur og völd sem felast í forsetaembættinu [...] til að tryggja samfellu í stjórnsýslunni og yfirgripsmikla vörn þjóðarinnar“. Hæstirétturinn lýsti því þó ekki yfir að Maduro væri varanlega horfinn úr forsetaembættinu. Ef forseti verður ófær um að gegna embætti sínu kveður stjórnarskrá Venesúela á um að halda verði kosningar innan 30 daga. Donald Trump Bandaríkjaforseti lýsti því yfir eftir brottnám Maduro að Bandaríkin myndu fara með stjórn í Venesúela þar til stjórnarskipti færu fram. Hann fullyrti þá jafnframt að Rodríguez hefði þegar svarið embættiseið sem nýr forseti landsins og að hún hefði lýst yfir vilja til að starfa með Bandaríkjunum. Trump sagði Rodríguez hafnaði þessu alfarið í sjónvarpsávarpi síðar um daginn. „Það er aðeins einn forseti í þessu landi og hann heitir Nicolás Maduro Moros,“ sagði hún. Í ávarpinu lagði Rodríguez áherslu á að stjórnvöld í Venesúela hygðust verja landið og auðlindir þess gegn ágangi Bandaríkjamanna. Varnarmálaráðherra landsins, Vladimir Padrino, tók í svipaðan streng.