ԱՄՆ նախագահ Դոնալդ Թրամփը, որ անցյալ շաբաթ զգուշացրել էր Թեհրանին, որ ԱՄՆ-ն կարող է օգնության հասնել ցուցարարներին, նախօրեին ևս մեկ նախազգուշացրեց. «Ավելի լավ է չսկսեք կրակել, որովհետև մենք էլ կսկսենք կրակել»։ «Ես պարզապես հույս ունեմ, որ Իրանում ցուցարարները անվտանգ կլինեն, քանի որ դա այժմ շատ վտանգավոր վայր է», - հավելել է Թրամփը: Իրանի գերագույն առաջնորդը Թրամփին կոչ է արել զբաղվել ԱՄՆ ներքին խնդիրներով, «եթե կարող է»: Երեկ հեռարձակված ելույթում այաթոլլա Ալի Խամենեին հայտարարել է, որ Իսլամական Հանրապետությունը չի նահանջի նրանց առաջ, «ովքեր զբաղվում են ավերածություններով», վնասում են հանրային սեփականությունը՝ փորձելով հաճոյանալ ԱՄՆ նախագահին: Խամենեին զգուշացրել է՝ Իրանը չի հանդուրժի նրանց, ովքեր որպես «օտարերկրացիների վարձկաններ» են գործում: Թեհրանում և Իրանի բազմաթիվ այլ քաղաքներում հակակառավարական զանգվածային ցույցերը շարունակվում են: Երկրում անջատվել է ինտերնետը: Դա հաստատել է նաև ինտերնետի ազատության հարցերով զբաղվող Netblocks խումբը: Ինտերնետի բացակայության պատճառով՝ Իրանից տեղեկատվության ստացումը նվազել է: Իրանի տեղեկատվական և հաղորդակցական տեխնոլոգիաների նախարարությունը հայտարարել է, որ ինտերնետը անջատելու որոշումը կայացվել է «իրավասու անվտանգության մարմինների կողմից՝ երկրում ստեղծված իրավիճակով պայմանավորված»։ Երկու շաբաթվա ընթացքում տասնյակ մարդիկ են սպանվելԴեպի Թեհրան և այլ քաղաքներ մի շարք չվերթներ են չեղարկվել, այդ թվում՝ Դուբայից և Ստամբուլից: Իրանի իրավապաշտպան HRANA խումբը նախօրեին հայտարարել է, որ դեկտեմբերի 28-ին սկսված ցույցերից ի վեր գրանցվել է առնվազն 62 մահվան դեպք, այդ թվում՝ 14 անվտանգության աշխատակից և 48 ցուցարար։ Ֆրանսիայի, Մեծ Բրիտանիայի և Գերմանիայի առաջնորդները ուրբաթ օրը համատեղ հայտարարություն են տարածել, որում դատապարտել են ցուցարարների սպանությունը և կոչ են արել Իրանի իշխանություններին զերծ մնալ բռնությունից։ ՄԱԿ-ի խոսնակ Ստեֆան Դյուժարիկը հայտարարել է, որ Միավորված Ազգերի Կազմակերպությունը խիստ անհանգստացած է մարդկային կորուստների կապակցությամբ։ «Աշխարհի ցանկացած վայրում մարդիկ իրավունք ունեն խաղաղ ցույցեր անցկացնել, և կառավարությունները պարտավոր են պաշտպանել այդ իրավունքը և ապահովել, որ այդ իրավունքը հարգվի», - ասել է կազմակերպության խոսնակը: Պետական հեռուստատեսության կողմից հրապարակված լուսանկարներում երևում են, ինչպես նշվում է, այրվող ավտոբուսներ, մեքենաներ և մոտոցիկլետներ, ինչպես նաև հրդեհներ մետրոյի կայարաններում և բանկերում։