Կանոնական դաշտ վերադառնալու մի քանի հորդորներից հետո Ամենայն Հայոց կաթողիկոսը վարչապետին միացած Գևորգ եպիսկոպոս Սարոյանին ազատել է Մասյացոտնի թեմի առաջնորդի պաշտոնից: Մայր Աթոռի հաղորդագրությունում նշվում է. «Տնօրինության համար հիմք են ծառայել առաջնորդի հանգամանքը չարաշահելու, պարտականությունների մեջ թերանալու, թեմի եկեղեցականաց նկատմամբ հարկադրանք ու ճնշումներ գործադրելու պարագաները։ Մասյացոտնի թեմի առաջնորդական տեղապահ է նշանակվել Հոգեշնորհ Տ․ Ռուբեն վարդապետ Զարգարյանը»: Գևորգ եպիսկոպոս Սարոյանը Վեհափառի հրաժարականը պահանջող 10 եպիսկոպոսների շարքում է: Արդյոք կաթողիկոսը կազատի նաև վարչապետին միացած մյուս ինը եպիսկոպոսներին, առայժմ պարզ չէ: Նա ավելի վաղ «Առավոտի» հետ զրույցում ասել էր, թե կաթողիկոսին վերագրվող մեղադրանքների վերաբերյալ փաստեր են դրվել իրենց առջև, որից հետո ինքը հասկացել է, թե ինչու եկեղեցին ներքշավեց քաղաքականության մեջ: Ո՞վ և ինչպիսի՞ փաստեր դրեց կաթողիկոսի հրաժարականը պահանջող եպիսկոպոսի առջև, Գևորգ սրբազանը չէր մանրամասնել, բայց պնդել էր. «Հայ եկեղեցին միայն մեր ազգային շահին պիտի ծառայի, և որևէ մեկը, ով ուզում է լինել, եկեղեցում իրավունք չունի ներքաշվել քաղաքական պայքարի մեջ, դա ծառայեցնելով օտար շահերի»: Լրագրողի դիտարկմանը՝ «հիմա Դուք հավատում եք, որ եկեղեցու առաջնորդը գործակալ է», նա արձագանքել էր. «Փաստաթղթեր, հանդիպումների ֆիքսված արձանագրություններ, ի՞նչ ասեմ էլ»: