Keflavík og Haukar mættust í 8-liða úrslitum bikarkeppni kvenna í körfubolta í dag þar sem Keflvíkingar lögðu Íslandsmeisara Hauka, 103-78. Liðin mættust síðast í deildinni á miðvikudaginn þegar Haukar unnu sannfærandi sigur, 94-73. Öllu meiri spenna var í leik dagsins, í það minnsta framan af. Fjögur stig munaði á liðunum eftir fyrsta leikhluta þegar Keflavík leiddi 20-16. Haukakonur áttu góðan kafla í öðrum leikhluta þar sem liðið vann upp forskotið og leiddi með sjö stigum í hálfleik, 41-48. Keflavík tók svo svo málin í sínar hendur í þeim þriðja. Þar lék liðið við hvurn sinn fingur og skoraði alls 28 stig í leikhlutanum á móti átta stigum Hauka og staðan 69-56 fyrir lokaleikhlutann. Í þeim fjórða virtist lítill kraftur í Haukakonum og á sama tíma gekk flest upp hjá Keflvíkingum. Loks unnu Keflvíkingar 25 stiga sigur, 103-78. Keishana Washington gekk í raðir Keflavíkur í haust og hún reyndist liðinu vel í dag. Alls skoraði hún 31 stig. Bikarinn heldur áfram á RÚV 2 Öll umferðin fer fram í dag. Leikur Tindastóls og KR hefst klukkan 18:00 og er sýndur á RÚV 2. Samtímis hefjast svo leikir Grindavíkur og Aþenu og Ármanns og Hamars/Þórs.