Slökkviliðið á höfuðborgarsvæðinu þurfti tvisvar að glíma við eldsvoða í íbúðarhúsnæði með skömmu millibili í nótt. Tveir voru fluttir á slysadeild með reykeitrun vegna elds í Háaleitishverfi en engan sakaði í húsbruna í Breiðholti. Tveir voru fluttir á slysadeild vegna reykeitrunar á fjórða tímanum í nótt eftir að eldur kviknaði í íbúð í fjölbýlishúsi í Háaleitishverfi í Reykjavík. Fimm voru innandyra þegar eldurinn braust út og komust út af sjálfsdáðum. Slökkvistarf gekk vel að sögn varðstjóra hjá slökkviliðinu á höfuðborgarsvæðinu en íbúðin er mikið skemmd. Hann segir fólkið lánsamt að hafa komist út. Skammt var stórra högga á milli því um klukkan fjögur var tilkynnt um bruna í einbýlishúsi í Breiðholti. Eldurinn kom upp í einu herbergja hússins. Þrír voru innandyra sem komu sér sjálfir út og þurftu ekki á frekari aðhlynningu að halda. Nærliggjandi íbúðir og hús voru ekki í hættu. Þrír slökkviliðsbílar voru sendir í hvort útkall auk sjúkrabíla. Varðstjórinn segir auk þessa hafa verið nóg að gera í sjúkraflutningum í nótt.