Шестмина полицајци беа убиени вчера од бомба поставена покрај патот, во северозападен Пакистан, во близина на границата со Авганистан, соопшти полицијата. Експлозијата се случила во округот Танк во покраината Хајбер Пахтунхва, изјави началникот на покраинската полиција Первез Шах. Началникот на полицијата Ишак Ахмад, кој бил на рутинска патрола во времето на нападот, е меѓу загинатите. Шах не даде дополнителни детали, велејќи дека истрагата е во тек. Пакистанскиот министер за внатрешни работи Мохсин Накви го осуди нападот и им оддаде почит на убиените полицајци. Во соопштението, тој изрази сочувство на семејствата на жртвите, велејќи дека тие „ги жртвувале своите животи за мир во земјата и нивната жртва нема да биде заборавена“. Ниту една група досега не ја презеде одговорноста. Сомневањето веројатно ќе падне врз движењето на пакистанските талибанци, кое ги засили нападите врз безбедносните сили и цивилите во последните месеци. Движењето на пакистанските талибанци е одвоено од талибанците кои управуваат со Авганистан, но е во сојуз со нив. Нападите од пакистанските талибанци се зголемија откако авганистанската влада се врати на власт во 2021 година. Исламабад го обвини Кабул дека ѝ дозволува на групата да ја користи нејзината територија за извршување напади на пакистанска територија, обвинение што авганистанската влада го негира. Односите меѓу двата соседа остануваат затегнати. Тензиите ескалираа во октомври откако Кабул го обвини Исламабад за извршување напад со дрон врз авганистанската престолнина. Десетици Авганистанци беа убиени во последователните гранични судири пред да стапи во сила договорот за прекин на огнот, постигнат со посредство на Катар, на 19 октомври. Прекинот на огнот останува на сила, иако неодамнешните преговори меѓу двете страни завршија без напредок.