Разни агенции, медиуми и невладини групи објавуваат извештаи за повеќе илјади жртви во неодамнешните немири во Иран, што би претставувало најголем број на настрадани во протести од Исламската револуција во 1979 година. Информациите што ги изнесуваат различните агенции и медиуми значително се разликуваат. Американската новинска агенција Human Rights Activists News Agency (HRANA), која повеќе од 20 години ги следи протестите во Иран, наведува дека се убиени најмалку 2.000 луѓе, од кои 1.850 демонстранти. Претставници на агенцијата вчера изјавија дека дотогаш идентификувале околу 500 жртви и додадоа дека се уапсени повеќе од 16.000 демонстранти. Од друга страна, Iran International проценува дека само на 8 и 9 јануари во протестите се убиени најмалку 12.000 луѓе. Станува збор за персиски информативен телевизиски канал со седиште во Британија, кој се поврзува со саудиската влада, а своите бројки ги заснова на извори во земјата и медицински податоци. - Врз основа на достапните податоци и вкрстената проверка на информациите добиени од сигурни извори, вклучувајќи го Врховниот совет за национална безбедност и претседателскиот кабинет, првичната проценка на безбедносните институции на Исламската Република е дека најмалку 12.000 луѓе се убиени во ова национално убивање, соопшти медиумот.