Само тројца играчи на Реал не се збогуваа со Чаби Александра Спасеска 14.01.2026 / 10:33 Фудбал Чаби Алонсо од понеделникот повеќе не е тренер на Реал Мадрид. Тој беше заменет еден ден откако Реал загуби со 3:2 од Барселона во финалето на шпанскиот Суперкуп. Новиот тренер е Алваро Арбелоа (42). Речиси сите играчи на Реал се збогуваа со Чаби на социјалните мрежи. Во статусите што ги напишаа по тој повод, тие го нагласуваат своето почитување кон Чаби и неговото знаење и жалаат што повеќе нема да соработуваат. Шпанските медиуми истакнуваат дека е индикативно што само тројца играчи не се збогуваа со отпуштениот тренер. Тоа се Винисиус, Трент Александар-Арнолд и Франко Мастантуоно. Ова е очекувано за Бразилецот, бидејќи пред два месеци тој поведе бунт против тренерот. После тоа, тој и Чаби се обидоа да покажат дека ги поправиле односите, но никој не им веруваше. Александар-Арнолд беше доведен од Ливерпул како ново десно крило, но повредата го принуди да излезе од тимот токму кога Алонсо почна да му дава можности. Мастантуоно е млад (18) играч од средниот ред кој дојде од Ривер Плата ова лето за 45 милиони евра. Тој одигра 17 натпревари со Чаби, од кои 10 како стартер. Реал ќе плати голема отштета Отказот на Чаби Алонсо ќе биде скап потег за Реал. Шпанскиот тренер и поранешен играч на Реал имаше плата од 8-9 милиони евра по сезона. Шпанскиот весник El Debate пишува дека Реал ќе мора да плати 15 милиони евра отштета на Чаби Алонсо. Да потсетиме дека минатото лето Реал плати уште 15 милиони евра отштета на Баер Леверкузен за Алонсо да се пресели во Мадрид. Шпанскиот Суперкуп беше означен како еден вид „последен тест“ за Алонсо, а евентуален трофеј би ја смирил ситуацијата на клупата. Откако Реал го исфрли Атлетико Мадрид во полуфиналето, поразот од Барселона во финалето дополнително ја потресе самодовербата на раководството, па набрзо дојде одлуката за прекин на соработката. Поранешниот шпански играч од средниот ред го водеше тимот во 34 натпревари, оствари 24 победи, четири нерешени и шест порази. Реал остана на второто место на табелата во шпанското првенство со 45 освоени бода по 19 кола, четири помалку од лидерот Барселона. Тие се седми во Лигата на шампионите со 12 бода по шест кола, а во Купот го освоија осминафиналето, каде што денес ги чека Албасете. Тогаш новиот тренер ќе го има своето деби. Чаби Алонсо Реал Мадрид Автор/Извор А.С. Прикажи во метро On