Manchester United vann Manchester City 2-0 í slagnum um Manchester-borg í ensku úrvalsdeild karla í fótbolta. Þetta var fyrsti leikur United undir stjórn bráðabirgðastjórans Michael Carrick. Markalaust var í hálfleik en Harry Maguire átti marktilraun í tréverkið í fyrri hálfleik. Í þeim seinni kom Bryan Mbeumo United yfir á 65. mínútu. Markið kom eftir skyndisókn og sendingu Bruno Fernandes. Patrick Dorgu tvöfaldaði forskot United á 76. mínútu er hann afgreiddi fyrirgjöf varamannsins Matheus Cunha í netið af stuttu færi. Mason Mount virtist hafa skorað þriðja mark United í uppbótartíma en það var að lokum dæmt af með aðstoð VAR-myndbandsdómgæslu. City var meira með boltann í leiknum, 68% gegn 32% United. En heimamenn voru beittari fram á við og áttu alls 11 skot gegn fjórum skotum City manna. Hver er staðan í deildinni? United er nú með 35 stig í 4. sæti og City er í 2. með 43 stig. Arsenal fær því tækifæri til að bæta enn á forskot sitt, en liðið er með 49 stig og mætir Nottingham Forest klukkan 17:30 í dag.