Ուկրաինան անցած գիշեր ենթարկվել է ավելի քան 200 ռուսական հարվածային անօդաչու թռչող սարքերի հարձակման։ Այդ մասին հայտնել է Ուկրաինայի նախագահ Վլադիմիր Զելենսկին։ Նրա խոսքով՝ հարձակումների հետևանքով տուժել են տասնյակ մարդիկ, այդ թվում՝ մեկ երեխա։ Այս պահի դրությամբ հայտնի է երկու զոհի մասին։ «Ընդհանուր առմամբ, այս շաբաթ արձակվել է ավելի քան 1300 հարձակողական անօդաչու թռչող սարք, մոտավորապես 1050 ուղղորդվող ավիառումբ և տարբեր տեսակի 29 հրթիռ», - նշել է Զելենսկին։ Ռուսական գիշերային հարձակման հետևանքով Խարկովում զոհվել է մի մարդ, ևս երեքը վիրավորվել։ Այդ մասին տեղեկացնում է Խարկովի մարզային դատախազությունը։ Ուկրաինայի Դնեպրոպետրովսկի մարզում ռուսական ԱԹՍ-երը հարձակվել են Սինելնիկի շրջանի համայնքի վրա։ Վեց մարդ վիրավորվել է, հայտնել են տեղական իշխանությունները: Մեկ մարդ վիրավորվել է Զապորոժիեի շրջանում: Ռուսաստանը կրկին հարձակվել է Օդեսայի մարզի էներգետիկ օբյեկտների վրա: