Sanna Magdalena Mörtudóttir, borgarfulltrúi Sósíalistaflokksins, mun leiða sameiginlegan lista Vors til vinstri og Vinstrihreyfingarinnar – græns framboðs í Reykjavík. Framboðið var tilkynnt í gær eftir félagsfund Vinstri grænna í Reykjavík. Líf Magneudóttir, oddviti VG í borgarstjórn, sagði það ekki sinn skilning að félagsfundur VG í Reykjavík hafi samþykkt endanlega að bjóða fram með Vori til vinstri. Líf segir í samtali við Vísi í dag að hún hafi hins vegar hlaupið á sig, hún styðji bæði framboðið og áformin. Sömuleiðis styðji hún Sönnu sem mun leiða listann. Líf segir að atvikið sé óheppilegt, hún hafi ekki séð yfirlýsingu stjórnar Vinstri grænna eftir fundinn, hún hefði mátt vanda sig betur og vera minni „pappakassi“. Sækist eftir oddvitasæti Líf sækist eftir oddvitasæti Vinstri grænna í forvali þeirra, þegar hefur Finnur Richart Andrason tilkynnt að hann muni bjóða sig fram í oddvitasætið. Sanna mun skipa fyrsta sæti listans undir formerkjum Vors til vinstri, Vinstri grænir munu skipa annað og þriðja og Vor til vinstri fær einnig það fjórða.