Gunnar Guðlaugsson, forstjóri Norðuráls, segir að gengið hafi betur en þau hafi þorað að vona að útvega nýja varahluti og nýja spenna eftir að stórtjón varð í álverinu á Grundartanga í október þegar tveir rafspennar biluðu. Heildartjón er ekki komið í ljós og Norðurál og Orkuveituna greinir enn á um orkusamninga. Á þriðjungsafköstum síðan í október Áfallið á Grundartanga hafði mikil áhrif. Álverið hefur verið keyrt á þriðjungsafköstum síðan í október. Lausráðnir starfsmenn hættu, Eimskip missti tekjur því Norðurál er einn stærsti viðskiptavinur skipafélagsins og þar sem Norðurál er stærsti viðskiptavinur Orkuveitunnar gerði Orkuveitan ráð fyrir milljarða samdrætti á þessu ári. Nú virðist sem gangsetning Norðuráls geti farið fyrr af stað en áætlað var. „Við nýttum okkur öll sambönd sem við höfðum og það fór fullt af fólki út um allan heim að leita að spennum og aðilum sem gætu smíðað fyrir okkar þessa spenna,“ segir Gunnar. „Og það svo sem á endanum gekk mun betur heldur en við þorðum að vona.“ Vonast til að komast í gang í lok apríl Fyrsti nýi spennirinn kemur í maí og hinir í lok sumars. Samtímis hafa verið smíðaðir varahlutir í biluðu spennana. Von er á þeim í byrjun mars. „Ef það gengur allt eftir þá reiknum við með geta byrjað að gangsetja í lok apríl.“ 340 ker þurfa að komast í gang. Tvö til fjögur ker að meðaltali verða gangsett á dag og það tekur 90 daga. „Við reiknum með að komast í fullt afköst í lok júlí,“ segir Gunnar. Umfang tjónsins enn óljóst Norðurál er nú byrjað að ráða margt fólk til starfa. Ekki er enn ljóst hvað olli biluninni. „Það er alveg ljóst að þetta er búnaður sem að átti að endast lengur.“ Hafið þið gengið úr skugga um að þið fáið tjónið bætt? „Það er auðvitað enn þá verið að vinna í þeim málum. Og auðvitað er það þannig að tjónið er ekki að fullu komið í ljós fyrr en að kerlínan er komin í rekstur aftur. Þannig að stærð tjónsins er ekki komin í ljós enn þá.“ Orkuveitan telur að samkvæmt samningum beri Norðurál að kaupa og greiða fyrir raforku hvort sem Norðurál nýtir hana eða ekki. Norðurál ber fyrir sig því sem kallað er force majeure í samningarétti. „Við lítum á þetta sem óviðráðanlegan atburð. Orkuveitan er ekki sammála okkur og á einhverjum tímapunkti hljótum við að komast að niðurstöðu þar sem allir geta lifað við.“