Принцот Ендру без контрола трошел народни пари за масажи, хотели, патувања Александра Спасеска 23.02.2026 / 14:13 Свет Ендру Маунтбатен-Виндзор плаќал за масажи и имал прекумерни патни трошоци на сметка на даночните обврзници додека бил британски трговски претставник, тврдат пензионирани државни службеници кои се решиле да зборуваат на темата. Ендру патувал низ светот како британски трговски претставник помеѓу 2001 и 2011 година, но неговата улога завршила поради неговите врски со осудениот педофил Џефри Епстин, објавува BBC. Спорни трошоци за масажа Поранешен државен службеник, кој работел за британското Министерство за трговија на почетокот на 2000-тите, толку се спротивставил на барањето на Ендру за „услуги за масажа“ што одбил да ги плати, но тврди дека бил принуден да го стори тоа од неговите претпоставени. „Мислев дека е погрешно. Реков дека не треба да плаќаме за тоа, но сепак плативме за тоа“, изјави тој за BBC, осврнувајќи се на барање што следело по посета на Ендру на Блискиот Исток. Тој рече дека жали што на Ендру му било дозволено да ги префрли трошоците за масажа бидејќи тоа можеби било можност да се провери неговото однесување. „Не можам да кажам дека тоа ќе го запреше, но требаше јасно да ставиме до знаење дека нешто не е во ред“, додаде пензионираниот државен службеник. Неговото тврдење е поткрепено од друг извор, поранешен висок функционер од Вајтхол кој ги надгледувал финансиите на одделот. Тој видел слични трошоци за патувањата на Ендру и вели дека „апсолутно нема сомнение“ дека се вистински. Двајцата поранешни државни службеници сакаа да останат анонимни, но разговараа со BBC одделно. BBC не виде докази за плаќањата за масажа, кои се стари повеќе од 20 години, но постои документација што потврдува дека информаторите биле на позиции на моќ во тоа време. Немало никакви индиции за нешто нелегално во однесувањето на Ендру. Екстраваганција и немање контрола Поранешен висок функционер од Вајтхол рече дека е шокиран од обемот на екстраваганцијата на Ендру како претставник, вклучувајќи ги и она што тој го нарече прекумерни трошоци за летови и неразумен број хотелски соби и трошоци за неговата придружба. „Не можев да поверувам, беше како да не беа вистински пари, како да не трошат свои пари“, рече високиот функционер. Тој додаде дека и покрај неговата одговорност за финансиите, имало слаба контрола врз трошењето и невнимателно водење евиденција. Тој тврди дека трошоците се губеле во различни буџети, што го отежнувало нивното следење, а ретко се знаело кој точно бил во придружбата на Ендру. За ова, тој го обвинува почитувањето што многу високи државни службеници го покажале кон тогашниот принц Ендру и нивната неподготвеност да му се спротистават. Проверките на патувањата на Ендру биле автоматски одобрени, се сеќава тој, наместо да се спроведува каква било вистинска контрола. принц Ендру британско кралско семејство Велика Британија Автор/Извор А.С. Прикажи во метро On