Donald Trump Bandaríkjaforseti hefur skipað alríkisstofnunum að yfirfara og birta öll gögn og upplýsingar sem tengjast óþekktum fljúgandi fyrirbærum og geimverum. Hann sagði í færslu á samfélagsmiðli sínum Truth Social gríðarlegan áhuga fólks á þessum fyrirbærum kveikjuna að fyrirskipuninni. Fjallað er um þessi mál í Þetta helst í dag. Sævar Helgi Bragason, vísindamiðlari, segir að birting áður leynilegra skjala um fljúgandi furðuhluti hafi alltaf reynst „óskaplega mikil vonbrigði.“ Bandaríkjaforseti hefur skipað alríkisstofnunum að birta gögn um fljúgandi fyrirbæri og geimverur. „Við vitum harla lítið um líf annars staðar en á jörðinni. Við þekkjum til dæmis tvo staði í sólkerfinu okkar þar sem líf gæti þrifist, og jafnvel þrjá. Það er þá Mars, Júpítertunglið Evrópa og Satúrnustunglið Enkeladus en við höfum aldrei fundið nein merki um eitthvað eða nein sönnunargögn fyrir því að líf þrífist annars staðar í alheiminum. Við höfum fundið nálægt sex þúsund önnur sólkerfi og þar af nokkrar plánetur sem gætu mögulega líkst jörðinni á einhvern hátt en það er ekkert í hendi eins og er, að minnsta kosti,“ segir Sævar Helgi. En þegar litið er á líkurnar, þá eru meiri líkur en minni að líf sé einhvers staðar annars staðar? „Já, alheimurinn er alveg brjálæðislega stór og ef við rýnum bara í okkar eigin vetrarbraut þá eru svona cirka kannski 400 milljarðar sóla í vetrarbrautinni okkar og langflestar þeirra eru litlar, það er að segja sambærileg við sólina okkar og minni og nánast hvert sem litið er finnum við reikistjörnur. Þannig að fjöldinn bara í okkar eigin vetrarbraut er slíkur að það getur varla verið annað en að líf þrífist einhvers staðar annars staðar, hvort það sé vitsmunalegt líf eða bara svona örverulíf vitum við ekki. Það er líklegra að það sé algengara að hafa einfaldara líf sem getur ekki einfaldlega ferðast um geiminn eða haft samband við okkur,“ segir Sævar. Stór hluti skjalanna þegar verið birtur Í skýrslu rannsóknarhóps á vegum bandaríska varnarmálaráðuneytisins, sem afhent var Bandaríkjaþingi fyrir tveimur árum, kom fram að ekkert benti til þess að jarðarbúar hefðu fengið heimsóknir utan úr geimnum. Ári fyrr birti Geimrannsóknastofnun Bandaríkjanna - NASA - skýrslu þar færð voru rök fyrir því að breyta þyrfti umræðunni um óútskýrða fljúgandi furðuhluti og færa á hærra plan. Þar kom fram að tvö til fimm prósent þeirra atvika sem tilkynnt er um séu raunverulega óútskýranleg - oftast séu þau flugvélar, blöðrur, drónar eða veðurfyrirbæri einhvers konar. Sævar Helgi bendir á að þegar hafi ýmis skjöl verið birt sem snúa að þessum málum. „Það er nú búið að birta stóran hluta af þessum skjölum hingað til en einhverju hefur verið haldið leyndu,“ segir hann. „Alltaf þegar þessi skjöl hafa verið birt þá eru þau óskaplega mikil vonbrigði. Það eina sem kemur fram er að það séu tilkynningar um eitthvað dularfullt sem ekki hafa fengist skýringar á og þar eiginlega við situr.“ „Þessi áhugi á fljúgandi furðuhlutum, eða óþekktum fljúgandi hlutum, virðist rosalega mikið bundinn við Bandaríkin. Það er kannski að einhverju leyti menningartengt líka. Bandaríkjamenn vantreysta ríkinu allhressilega, kannski meira heldur en gengur og gerist á öðrum Vesturlöndum, þannig að þessi áhugi fólks á fljúgandi furðuhlutum virðist vera meiri þar en til dæmis í Evrópu,“ segir Sævar. Nánar er rætt um þessi mál í Þetta helst í dag.