Velferðarsvið Kópavogsbæjar hefur beðið fjölskyldu drengs sem vistaður var á Bakkakoti afsökunar. Beðist er afsökunar á því að ekki hafi verið brugðist við með viðeigandi hætti á sínum tíma og að dvöl drengsins hafi ekki verið stöðvuð án tafar þegar upplýsingar lágu fyrir um skelfilegan aðbúnað og ofbeldi á Bakkakoti. Velferðarsvið Kópavogs er fyrsta opinbera stofnunin sem biðst afsökunar vegna málsins svo vitað sé. Sigrún Þórarinsdóttir, sviðsstjóri Velferðarsviðs Kópavogsbæjar, segir að þegar umfjöllun í seinni þætti Kveiks var birt hafi komið skýrt fram að drengurinn var vistaður á Bakkakoti á vegum Kópavogsbæjar. Gögn sem var fjallað um í þættinum hafi bent til að upplýsingar hafi legið fyrir um slæman aðbúnað á Bakkakoti. Þrátt fyrir það hafi ekki verið brugðist við. „Þá er ekkert annað hægt að gera heldur en að biðjast afsökunar,“ segir Sigrún sem segir það sitt hlutverk sem sviðstjóri velferðarsviðs Kópavogsbæjar að biðjast afsökunar, sama hve langt eða stutt sé liðið frá atburðinum. Hún telur þetta einnig eiga við um ríkið og önnur sveitarfélög sem komu að málum Bakkakots á sínum tíma. „Auðvitað þarf að grafa ofan í alls konar upplýsingar og gögn til að átta sig á því hvað átti sér sannarlega stað í málavinnslu og slíku en ef það eru fyrirliggjandi upplýsingar sem segja að misbrestur hafi orðið, að ekki hafi verið brugðist við, þá er þetta það fyrsta sem við eigum alltaf að gera,“ segir hún. „Við eigum að taka það til okkar, við eigum að biðjast afsökunar, við eigum að sýna hluttekningu og átta okkur á því að í þessum aðstæðum, eins og hefur komið fram hjá þessum ótrúlega hugrökku ungu mönnum, þá voru þetta saklaus lítil börn sem voru svipt bernsku sinni,“ segir Sigrún sem telur það óafsakanlegt að þeir sem hafa áttu eftirlit með Bakkakoti hafi af einhverjum ástæðum ekki gert það. „Og við verðum að taka það til okkar, við verðum að passa að fara ekki í vörnina og passa að við eigum það sem við eigum,“ segir hún. Sigrún segir að hún sjálf hafi ákveðið sem sviðsstjóri Velferðarsviðs að hafa samband við fjölskylduna fyrir hönd velferðarsviðs og þáverandi barnaverndarnefndar sem hafi verið lögð niður fyrir þó nokkru. Það sé ábyrgðarhlutverk þeirra forsvarsaðila sem sjái um málaflokkinn á hverjum tíma fyrir sig. Hún hafi líkt og aðrir starfsmenn í velferðarmálum fylgst vel með umfjöllun Kveiks um Bakkakot „Gjörsamlega harmi slegin,“ segir Sigrún. „Það er hræðilegt að hlusta á þessar frásagnir en ef þessir ungu menn geta sýnt þetta mikla hugrekki í að koma fram þá verðum við sem störfum í þessum málaflokkum, þó að við séum alltaf sett í þær aðstæður að við getum ekki rætt einstök mál, við verðum líka að hafa hugrekki til að koma fram og ræða málin og taka ábyrgð,“ segir hún. Ein staðfest afsökunarbeiðni Sigrún segir ekki hægt að staðfesta að póstar hafi verið sendir á fleiri fjölskyldur. Með þessum pósti sé verið að bregðast við þessu tiltekna máli. Hún geti ekki sagt til um hvort fleiri mál séu til skoðunar hjá velferðarsviði Kópavogs. „Það getur auðvitað komið til þess og ég held að við séum öll, sveitarfélögin sem komu að því að vista börn í Bakkakoti á sínum tíma, viðbúin því að það séu fleiri börn sem voru þarna og, eins og hefur líka sýnt sig, fleiri stigu fram eftir þessa fyrstu umfjöllun í Kveiksþættinum,“ segir Sigrún. Sama muni eiga við ef gögn staðfesta að ekki hafi verið brugðist við með réttum hætti. Velferðarsvið muni að taka ábyrgð á því líka. Eftir að umfjöllun Kveiks birtist segir Sigrún að gripið hafi verið til aðgerða. Barnaverndarþjónustan í Kópavogi hafi farið yfir öll mál sem varði börn sem hafi verið vistuð utan heimilis. Þá hafi einnig farið fram athugun á því hvernig verklag sé í kringum vistun barna utan heimilis og hversu mörg þau börn eru. „Af því að við berum sannarlega ríkar skyldur til að fylgja börnunum okkar eftir sem eru vistuð, tryggja að eftirlitið og aðbúnaður sé í lagi og ég veit að fleiri sveitarfélög hafa verið að gera slíkt hið sama,“ segir hún. Kallar eftir frekara samstarfi við ríkið Varðandi framtíðina segir Sigrún að Velferðarsvið Kópavogs og aðrar stofnanir í málaflokknum bíði upplýsingum um aðgerðir ríkisins. „Ríkisstjórnin samþykkti fjórar mjög flottar aðgerðir til að bregðast,“ segir hún. „En mér skilst að það þurfi einhver lagafrumvörp, til dæmis varðandi sanngirnisbætur og rannsóknarnefnd og endurskoðun á fósturkerfinu í heild sinni, en tíminn bara líður og við heyrum ekki neitt,“ segir Sigrún sem kallar eftir því að sveitarfélögin og stofnanir innan þeirra verði kölluð að borðinu og fái að taka þátt í þeirri vinnu sem sé fram undan. „Við höfum ekkert heyrt í þeim ríkisstofnunum sem koma að þessum málaflokkum og ég kalla eftir því að við verðum kölluð að borðinu og fáum að vera með í þeirri vinnu sem er fram undan,“ segir hún.