Tveir af hverjum þremur dönskum foreldrum styðja börn sín fjárhagslega, jafnvel þó þau séu flutt að heiman. Vasapeningar, símareikningar og matvara er meðal þess sem foreldrarnir borga. Þetta kemur fram í könnun sem YouGov gerði fyrir Nordea-bankann. Samkvæmt henni veita 57 prósent foreldra börnum sínum á aldrinum átján til tuttugu og níu ára fjárhagslega aðstoð, jafnvel þó að þau séu flutt að heiman. „Ég heimsæki móður mína, fæ að borða og þvæ þvottinn minn,“ segir Lukas Christian Backhausen, nemi í málvísindum við Kaupmannahafnarháskóla. Louise Sandberg Madsen segir móður sína hjálpa sér við að borga símareikninginn og við ferðalög. 46 prósent foreldra ungs fólks á aldrinum 27 til 29 ára segjast styðja börn sín fjárhagslega, hvort sem þau eru flutt að heiman eða ekki. Ida Moesby, hagfræðingur hjá Nordea, segir hlutfallið koma sér á óvart. Hún átti ekki von á því að svo margir foreldrar aðstoði börnin sín. „Við tölum mikið um að ungt fólk sé undir fjárhagslegri pressu og að margt ungt fólk sem þarf fjárhagsaðstoð.“ Susan Caspersen er aðalgreinandi hjá hugveitunni Arbejderbevægelsens Erhvervsråd. Hann segir að það sem skíni í gegn í könnuninni sé breið millistétt sem vilji aðstoða börnin sín. Eftir verðbólgu 2022 hafi laun aftur hækkað meira en verð og það endurspeglist í tölunum. „Ég held að margir hafi það nokkuð gott aftur og finnist börnin þurfa meira á peningunum en þau gera.“ Madsen segir það ekki góða tilfinningu að þurfa á fjárhagslegri aðstoð að halda frá foreldrum. „Sérstaklega þegar maður er orðinn 23 ára, ég held að margir nemar væru til í að hafa meiri stjórn á fjármálum sínum.“