Stefnuræða Donalds Trump forseta Bandaríkjanna á þinginu í nótt snerist lítið um stefnumál en þeim mun meira um hversu margt gott hefði gerst á fyrsta ári seinni embættistíðar hans. Hann lenti í orðaskiptum þegar talið barst að innflytjendamálum. Stefnuræða Donalds Trump forseta Bandaríkjanna í nótt var uppfull af staðreyndarvillum um efnahagsmál, landamæri og kosningar. Stemningin varð á tímabili spennuþrungin, einkum þegar rætt var um innflytjendamál. Fjölmiðlar bæði vestan hafs og austan hafa rýnt í ræðuna og greint þar fjölmargar rangar eða villandi staðhæfingar. Hér að ofan má sjá hluta þeirra. Hann talaði meðal annars um metverðbólgu þegar hann tók við. Það er ekki rétt, því hún hafði þá minnkað töluvert frá því þegar hún var hæst á kjörtímabilinu – 9,1% í júní 2022. Þar vógu þungt áhrif frá innrás Rússa í Úkraínu. Verðbólgumetið er 23,7% frá 1920. Verðbólgan náði líka yfir 9% um tíma á bæði áttunda og níunda áratugnum. Hún var 3% þegar Trump tók við og er 2,4% núna. Hann talaði líka um galopin landamæri, sem eru ýkjur í besta falli. Þeim sem fóru um landamærin hafði þegar fækkað töluvert áður en Trump tók við. Þeim hefur þó sannarlega fækkað enn frekar síðan þá. Trump sagði í umræðu um tollana að erlend ríki greiddu þá. Erlend ríki greiða ekki tollana heldur almenningur sem kaupir vörurnar sem tollar eru lagðir á, þ.e. ef fyrirtækin ákveða ekki að taka þá á sig. Erlend ríki gætu orðið fyrir tjóni í formi minni viðskipta en þau greiða sannarlega ekki tollana. Trump sagði að bensínlítrinn væri nú kominn undir 2,30 dollara á gallon (73 krónur á lítrann). Verðið er hvergi svo lágt í Bandaríkjunum. Hann segir líka að kosningasvindl sé víðtækt, og notað það sem rök fyrir breytingum sem hann vill gera á kosningalögum. Nýleg rannsókn þjóðaröryggisstofnunar Bandaríkjanna sýnir að um 0,02% af atkvæðum koma frá fólki sem var ekki bandarískir ríkisborgarar. Engar frekari ásakanir um svindl hafa verið sannaðar. Þetta er aðeins brot af þeim villandi staðhæfingum sem komu fram í ræðunni. En það var fleira sem vakti athygli. Hann bauð íshokkíliði Bandaríkjanna í þingið til að horfa á ræðuna, en þeir unnu gullverðlaun á nýafstöðnum Vetrarólymíuleikum. Minntist sérstaklega á Sómala... En mesta spennan varð þegar hann ræddi innflytjendamál. Hann sagði að í mörgum heimshlutum væru mútur, spilling og lögleysa eðlileg og nefndi þar sérstaklega Sómalíu sem hann telur eiga stærstan hlut í glæpum í Minnesota. Hann bað svo alla að standa upp sem væru sammála því að fyrsta skylda bandarískrar ríkisstjórnar væri að vernda bandaríska ríkisborgara, ekki ólöglega innflytjendur. Stefnuræða Donalds Trump forseta Bandaríkjanna í nótt var uppfull af staðreyndarvillum um efnahagsmál, landamæri og kosningar. Stemningin varð á tímabili spennuþrungin, einkum þegar rætt var um innflytjendamál. Það var mjög flokkaskipt hverjir stóðu upp og hverjir ekki. Trump vandaði þeim sem sátu ekki kveðjurnar og sagði að þau ættu að skammast sín. Þau kæmu í veg fyrir að glæpamönnum sé vísað úr landi. Tveir þingmenn Demókrata létu þetta ekki óátalið og sögðu meðal annars að Trump hefði drepið bandaríska ríkisborgara, og vísuðu þar í tvo sem ICE drap í aðgerðum sínum í Minneapolis. ...en ekkert á Grænland Danskir fjölmiðlar hafa vakið athygli á því að Trump minntist ekki á Grænland einu orði í ræðunni. Fréttamaður danska ríkisútvarpsins á Grænlandi segir að það hafi verið góð byrjun á deginum fyrir marga Grænlendinga.