Í Mýrinni í húsi Grósku fer nú fram það sem kallað er hakkaþon á vegum umbreytingaherstjórnar Atlantshafsbandalagsins í Norfolk. Þar sitja sérfræðingar og forritarar frá 21 aðildarríki Nató, alls 140 manns, fram á föstudag. Þeir leita leiða til að greina vanda með hjálp gervigreindar, til dæmis við að bæta skráningu særðra og leysa tækniáskoranir. Patrick Ratier, yfirmaður borgaralegrar alþjóðadeildar NATO act, segir gervigreindina vendipunkt á þessu sviði. „Vendipunkturinn á þessu sviði er gervigreindin. Þegar árásir verða æ þróaðri þarf sjálfvirkt viðbragð með stuðningi gervigreindar til að geta tekist á við þetta. Þess vegna stingur Ísland upp á þessu verkefni, að nota gervigreind til að efla viðbragðsgetu og geta svarað betur þessum háþróuðu árásum,“ segir Ratier. Gervigreind er beitt í síauknum mæli við netárásir, hraðinn verður stöðugt meiri og áskorun dagsins snýst um að ná þeim hraða. Fjöldi sérfræðinga er saman kominn í Reykjavík til að leysa alls kyns áskoranir sem meðal annars beinast að stríðsrekstri. Leita nýrra lausna við nýjum áskorunum Fjórtán Íslendingar taka þátt og CERTIS stýrir því liði. Áskorunin snýst um að nýta gervigreind til að greina netárásir. Magni Sigurðsson, forstöðumaður CERTIS, segir gríðarlegan hraða í netárásum í dag. „Árásaraðilar eru að nýta í auknum mæli gervigreind til að framkvæma árásir þannig að það er mikill hraði. Áskorunin í dag er að ná sama hraða og er í gangi,“ segir Magni sem er bjartsýnn á að lausnir finnist á hakkaþoninu. Því sé vettvangurinn nauðsynlegur til að hitta aðra og finna sameiginlegar lausnir. Talia Beech, tæknilegur ráðgjafi NATO act, segir hakkaþonið ganga vel. „Við höfum séð þróaðar lausnir og það hefur verið afar spennandi að sjá alla hakkarana vinna þessa góðu vinnu. Það er hvetjandi. Sjálf ætla ég heim og rannsaka málið nánar, læra hvað hægt er að gera og hvernig þessar lausnir nýtast,“ segir Beech. Úkraínumenn komnir til að læra af alþjóðlegum teymum Tvö lið eru frá Úkraínu. Þau mæta með raunverulegar áskoranir beint frá heimalandinu og vilja nýta gervigreind til að greina betur skotmörk, til dæmis hvort sem um vopnabúr er að ræða eða leikskóla. „Við viljum læra af alþjóðlegum teymum og deila reynslu okkar frá Úkraínu, af vígvöllunum, með beinum hætti,“ segir Yevhenii Redziok, sem tekur þátt í hakkaþoninu. Verður þetta jákvætt fyrir ykkur? „Já, tvímælalaust,“ segir Redziok.