Danska leyniþjónustan, PET, og FE, leyniþjónusta danska hersins, hafa varað við erlendum afskiptum í aðdraganda kosninga í Danmörku sem verða 24. mars næstkomandi. Í sameiginlegri yfirlýsingu sem leyniþjónusturnar sendu frá sér í gær kemur fram að helsta ógnin sé talin vera rússnesk afskipti sem ætlað sé að hafa áhrif á kosningarnar vegna einarðs stuðnings Danmerkur við Úkraínu. Önnur erlend afskipti eru þó ekki útilokuð. Leyniþjónusturnar segja að markmið erlendra afskipta sé að sá fræjum sundrungar, hafa áhrif á almenna umræðu og beinast gegn ákveðnum frambjóðendum, stjórnmálaflokkum eða stefnumálum. Leyniþjónusturnar nefna sem dæmi að áhugi Bandaríkjanna á að yfirtaka Grænland hefur leitt til upplýsingaóreiðu um Danmörku, sem hefur skapað aðstæður sem Rússland og Kína gætu nýtt sér til frekari áhrifa. Mette Frederiksen forsætisráðherra boðaði til þingkosninganna á fimmtudaginn. Samkvæmt skoðanakönnun sem TV2 greindi frá í gær nýtur Jafnaðarmannaflokkurinn 21% stuðnings kjósenda, sem myndi tryggja flokknum meirihluta á þinginu. Fylgi flokksins nú er þó 6,5% lægra en í síðustu kosningum árið 2022. Fylgi flokksins hefur þó verið á uppleið síðustu vikur sem rakið er til vaskrar frammistöðu Frederiksen í málefnum Grænlands.