ඇමරිකා එක්සත් ජනපදය සහ ඊශ්‍රායලය එක්ව ඉරානය වෙත ගුවන් සහ මුහුදු මාර්ගයෙන් එල්ල කළ ඒකාබද්ධ ප්‍රහාරයක් සමග මැද පෙරදිග කලාපය පුරා පූර්ණ පරිමාණයේ යුද්ධයක් ආරම්භ වී තිබේ. "Operation Epic Fury" සහ "Operation Roaring Lion" ලෙස නම් කර ඇති මෙම මෙහෙයුම් මගින් ඉරානය පුරා ඉලක්ක 30කට අධික සංඛ්‍යාවකට ප්‍රහාර එල්ල කර ඇත. වාර්තා වන අන්දමට ඉරාන ජනාධිපතිවරයාගේ නිල නිවස, උත්තරීතර නායකයාගේ කාර්යාලය, බුද්ධි අමාත්‍යාංශය සහ ආරක්ෂක අමාත්‍යාංශය ඇතුළු ප්‍රධාන රජයේ ගොඩනැගිලි රැසකට ප්‍රහාර එල්ල වී තිබේ. ඉරානයේ සංවේදී යුද මධ්‍යස්ථානයක් වන පර්චින් (Parchin) සහ බැලස්ටික් මිසයිල යටිතල පහසුකම් පිහිටි බටහිර ඉරානයේ කලාප ද ප්‍රහාරයට ලක්ව ඇත. ඉරාන උත්තරීතර නායක අයතුල්ලා අලි කමේනි මේ වන විට ආරක්ෂිත ස්ථානයකට මාරු කර ඇති බව රොයිටර් පුවත් සේවය සඳහන් කරයි. ඇමරිකානු ජනාධිපති ඩොනල්ඩ් ට්‍රම්ප් ප්‍රකාශ කර සිටියේ ඉරානය සතු දිගු දුර මිසයිල සහ න්‍යෂ්ටික වැඩසටහන මගින් ලෝකයට එල්ල වන තර්ජනය තුරන් කිරීම සඳහා මෙම ප්‍රහාරය එල්ල කළ බවයි. "අවි බිම තබන්න, නැතහොත් මරණයට මුහුණ දෙන්න" යැයි ඔහු ඉරානයට අනතුරු අඟවා තිබේ. ඊශ්‍රායල අගමැති බෙන්ජමින් නෙතන්යාහු පැවසුවේ ඉරානයෙන් එල්ල වන "පැවැත්ම පිළිබඳ තර්ජනය" ඉවත් කිරීම මෙම මෙහෙයුමේ අරමුණ බවයි. මෙම ප්‍රහාරයට ප්‍රතිචාර වශයෙන් ඉරානය සහ හිස්බුල්ලා සහ හූති සංවිධාන එක්ව තෙල් අවිව් (Tel Aviv) නගරය ඉලක්ක කර ගනිමින් මිසයිල වර්ෂාවක් එල්ල කර තිබේ. ඉරාන රජය පවසා ඇත්තේ මෙය "දරුණු" ප්‍රතිප්‍රහාරයක ආරම්භය පමණක් බවයි. පවතින යුදමය වාතාවරණය හේතුවෙන් ඉරානය සහ ඊශ්‍රායලය සිය ගුවන් සීමාවන් සිවිල් ගුවන් ගමන් සඳහා වසා දමා ඇති අතර, ඊශ්‍රායලය රට තුළ හදිසි නීතිය ප්‍රකාශයට පත් කර ඇත. ටෙහෙරානය ඇතුළු නගරවල ජනතාව භීතියට පත්ව නගරවලින් ඉවත් වීමට උත්සාහ කරන බවත්, ඉන්ධන පිරවුම්හල් අසල දිගු පෝලිම් පවතින බවත් වාර්තා වේ. මේ පුවත තව අයට බලන්න Facebook එකට Share කරන්න WhatsApp එකට Share කරන්න