Која е Хана Спенсер, поранешна водоинсталатерка која стана пратеничка во британскиот парламент? Александра Спасеска 28.02.2026 / 12:46 Свет Од водоинсталатерка до пратеничка - Хана Спенсер се пробива во британскиот Долен дом како прва кандидатка на Зелените што освои место на дополнителните избори во Вестминстер. Хана Спенсер (34) ја одбележа својата победа во изборната единица Гортон и Дентон во Голем Манчестер извинувајќи им се на своите клиенти: „Мислам дека ќе морам да ви ги откажам резервираните термини затоа што одам во Парламентот“, објавува BBC . „И кога ќе стигнам таму, ќе направам место за сите што работат професии како мојата - конечно добиваме место на масата.“ Спенсер почнала да работи како водоводџија откако го напуштила училиштето на 16 години, а 2026 година ја започнала со амбиција за „нова година, нов занает“. Се вратила на колеџ за да започне курс по малтерисување со полно работно време, но за неколку недели ги комбинирала студиите - патување со автомобил до часови во Стоук - со кампања во Гортон и Дентон. На LinkedIn објавила дека во последниве години „постепено самата се школувала и се занимавала со малтерисување“, но дека се запишала на интензивен курс за да може „да опфати повеќе делови од проектот“. Додаде: „Плус, едноставно сакам да пробам нешто ново и да не застанам додека не го направам како што треба“. Иако во својот победнички говор нагласила дека „не растела со желбата да биде политичарка“, Долниот дом нема да биде нејзино прво политичко искуство. Таа моментално го води Советот на општината Трафорд на Зелените, каде што го претставува округот Хејл од мај 2023 година. Спенсер беше и кандидатка на Зелените за изборите за градоначалник на Манчестер во 2024 година. Таа сега ќе стане петтиот пратеник на Зелените, придружувајќи им се на Сиан Бери, Адријан Ремзи, Карла Дениер и Ели Чоунс. Кога се претстави како кандидатка на дополнителните избори, партијата забележа дека Спенсер е родена во Болтон и „целиот свој живот живеела во Манчестер“. Спенсер, која ја опишуваат како отворена и автентична, еднаш напиша дека е „среќна“ што се преселила од Гортон и Дентон. За време на кампањата, таа го привлече вниманието на медиумите за објава од 2021 година на форумот Mumsnet, во која рече дека Левеншулм е „во голема мера уништен“ од „(наводни) перачи на пари во форма на ресторани за брза храна“ и дека независните бизниси „не можат да кренат глава“. Зелените одговорија дека објавата ја покажува „посветеноста“ на Спенсер кон областа и нејзиното „разочарување“ што независните бизниси се истиснуваат. Спенсер, исто така, се опишува себеси како маратонка и „цимерка на четири згрижени хртови“, а кучињата беа видени како „водат кампања“ со неа во изборната единица. Велика Британија Автор/Извор А.С. Прикажи во метро On