Áhrif þess að myndir frá Íslandi birtast í sjónvarpsþáttum eða öðru afþreyingarefni eru ótvíræð, segir ferðamálastjóri. Fjöldi þeirra sem leituðu að Háafossi á netinu jókst um 5.000% eftir að fossinn birtist í lokaþætti Stranger Things. Fram kom í fréttum RÚV í gær að vinsældir Háafoss í Þjórsárdal hafi stóraukist eftir að fossinn birtist í lokaþætti þáttaraðarinnar Stranger Things um áramótin. Meira en 100 milljónir horfðu á þáttinn á Netflix. Fjöldi þeirra sem gúggluðu Háafoss jókst um fimm þúsund prósent eftir að þátturinn var sýndur. Arnar Már Ólafsson ferðamálastjóri segir ljóst að birting í slíku afþreyingarefni sé verðmæt fyrir ferðaþjónustu á Íslandi. „Það hefur mikil áhrif,“ segir Arnar Már. Skoðanakannanir Ferðamálastofu sýni þetta. „Við hjá Ferðamálastofu höfum verið að reyna að skoða þetta sérstaklega og við erum með svokallaða landamærarannsókn þar sem við erum að spyrja ferðamenn sem koma til landsins um ýmsa þætti sem varðar dvöl þeirra hér og að hve miklu leyti ákveðnir þættir hafa áhrif á þeirra ákvarðanir um að heimsækja Ísland,“ segir Arnar Már. „Alþjóðlegar kvikmyndir og heimildarmyndir, sjónvarpsþættir, tónlistarmyndbönd og þess háttar sem sýnir íslenskt landslag, samkvæmt þessu þá segir um helmingur þeirra sem koma til Íslands að þetta hafi að einhverju leyti áhrif á þeirra ákvörðun um að koma.“ Þetta er ekki í fyrsta sinn sem álíka gerist. Til dæmis kom kvikmyndin The Secret Life of Walter Mitty Kirkjufelli á kortið meðal ferðamanna en myndin var að stórum hluta tekin upp á Íslandi. Þá koma á hverju ári fjölmargir hingað gagngert til að heimsækja þá staði þar sem þáttaröðin Game of Thrones var tekin upp. Það vakti líka mikla athygli þegar Justin Bieber tók upp tónlistarmyndband á Íslandi árið 2015. „Önnur dæmi eins og Fjaðrárgljúfur og flugvélaflakið á Sólheimasandi og fleiri, þannig að við sjáum hvað samfélagsmiðlar og svona skjáir, þar sem Ísland birtist á skjá, hefur mikil áhrif, bæði um ákvörðunina um að koma til Íslands og eins líka hvernig ferðamenn dreifast um landið þegar þeir eru komnir,“ segir Arnar Már.