Belarúski stjórnarandstæðingurinn Maria Kolensnikova segir mikilvægt að rjúfa einangrun Belarús, því einangrun landsins gagnist aðeins Vladimir Pútín Rússlandsforseta. Kolensnkikova afplánaði 5 ára dóm sem pólitískur fangi í Belarús, en var látin laus í desember síðastliðnum. Maria Kolensnikova er ein þriggja kvenna frá Belarús sem leiddu mótmæli gegn stjórnvöldum í landinu fyrir sex árum. María ásamt Veronika Tsepkalo og Sviatlana Tsikhanouskaya voru áberandi í kosningabaráttunni fyrir forsetakosningarnar árið 2020, eftir að eiginmaður Sviatlana og forsetaframbjóðandinn Sergei Tikanovsky, var handtekinn og dæmdur í fangelsi. Sviatlana bauð sig fram á móti sitjandi forseta, Aleksander Lukashenko, sem var lýstur sigurvegari kosninganna. Í kjölfarið brutust út ein mestu mótmæli í landinu hin síðari ár sem stóðu fram á árið 2021. Stjórnvöld í Minsk mættu mótmælendum af mikilli hörku og þúsundir voru handtekin. Dæmd í 11 ára fangelsi María var handtekin í Minsk árið 2020 og var flutt að landamærastöð því til stóð að vísa henni úr landi. Hún mótmælti því, reif vegabréf sitt og gekk aftur áleiðis að landamærum Belarús. María fékk 11 ára dóm fyrir samsæri og landráð. María afplánaði stóran hluta dómsins í einangrun og lengi vel vissu aðstandendur hennar ekki hvort hún væri lífs eða liðin. Það var svo fyrir milligöngu bandarískra yfirvalda að hún, auk 122 annarra pólitískra fanga, var seppt úr fangelsi í Belarús í desember síðastliðnum. María býr nú í Berlín í Þýskalandi en hún bjó einnig í Þýskalandi fyrir mótmælin og starfaði sem flautuleikari. Hún er enn að vinna að því með aðstoð þýskra yfirvalda að fá skilríki frá Belarús og koma undir sig fótunum að nýju í Berlín. Einangrun bitnar mest á almennum borgurum Í viðtali við litháíska ríkisútvarpið LRT , segir María að einangrun landsins bitni á almennum borgurum og að einangrun landsins gagnist aðeins Vladimir Pútín Rússlandsforseta. Hún segir að almennir borgarar sem geti hvorki ferðast eða stundað nám í löndum Evrópusambandsins missi tengsl við evrópska menningu og við það muni þeir snúa sér til austurs. María vill að evrópskir stjórnmálamenn þrýsti á stjórnvöld í Belarús um að frelsa pólitíska fanga og enda pólitíska kúgun og einangrun landsins. Ýmsar efnahags- og viðskiptaþvinganir hafa verið settar á Belarús frá því að innrás Rússa hófst í Úkraínu vegna stuðnings Belarúsa við innrás Rússa. Evrópuráðið ákvað í síðustu viku að framlengja refsiaðgerðir á Belarús í átt til viðbótar án breytinga. Refsingarnar voru settar á ríkisstjórn Alexander Lukashenko en ná jafnframt til 312 Belarúsa, 57 fyrirtækja og samtaka. Eignir þeirra í Evrópu hafa verið frystar og ríkisborgurum Evrópusambandslanda og fólki í viðskiptalífinu er meinað að eiga í viðskiptum við þau. Þá er einstaklingum á listanum bannað að koma til sambandsríkja ESB, samkvæmt frétt LRT um refsiaðgerðirnar. Belarús er stundum nefnt síðasta einræðisríki Evrópu en Lukashenko hefur verið forseti frá árinu 1994. Hann er sagður stýra landinu með harðri hendi. Til marks um það þá eru að minnsta kosti 1.100 pólitískir fangar enn í fangelsum í Belarús.