Prófessor í Mið-Austurlandafræðum segir óljóst hvað vaki fyrir Bandaríkjaforseta með aðgerðum Bandaríkjanna og Ísraels í Íran. Enn meiri þungi er í átökunum þrátt fyrir að ríkin hafi ráðið æðsta klerk Íran af dögum í gær. Vísbendingar séu um að þetta verði jafnstórt verkefni og innrásin í Írak 2003. Nánast bara sturlun Fyrirætlanir Donalds Trumps Bandaríkjaforseta um að fara inn í Íran með þessum hætti og steypa stjórnvöldum af stalli, eru ekki líklegar til að ganga að mati Magnúsar Þorkels Bernharðssonar, prófessors í Mið-Austurlandafræðum. „Það er ekki líklegt að það að ráðast með þessum hætti og taka af lífi helsta stjórnmálamann landsins, leiði til jákvæðs árangurs. Vegna þess að Íranir eru mjög samstillt þjóð og þetta er ekki þeirra leið til þess að ná fram þessum breytingum.“ Ekki hafi stafað mikil hætta af stjórnvöldum í Íran, sem kalli á þessar aðgerðir. „Ég held að svo sé ekki. Þeir hafa verið í ýmsum verkefnum erlendis undanfarin ár en það var ekkert núna sem benti til þess að það væri mikil ógn yfirstandandi.“ Magnús Þorkell bendir á að stríðið sem var háð síðasta sumar milli Ísraels og Írans, hafi verið takmarkað og þá hafi hermáttur og geta Írana til hernaðar komið í ljós. „Það sást þá að þeir hafa ekki burði til þess að vera raunveruleg ógn við umheiminn eða við Bandaríkin. Þannig að þessi ákvörðun var tekin án þess raunverulega að það séu öryggishagsmunir þar að veði.“ Samningaviðræður Írans og Bandaríkjanna, með milligöngu Ómana, um kjarnorkuáætlun Írans hafa verið í Genf í Sviss síðustu vikur. „Það er svo furðulegt. Í síðastliðinni viku þá voru Íranir og Bandaríkjamenn í friðarviðræðum í Genf, þar sem þeir voru að ræða ákveðnar diplómatískar lausnir við þessu ágreiningsmáli þeirra. Núna kemur þetta í kjölfarið af því.“ Magnús Þorkell segir erfitt að átta sig á því af hverju Bandaríkjastjórn og Ísraelsmenn fara í þessar aðgerðir á þessum tímapunkti. „Þess vegna er staðan eiginlega bara... þetta er nánast bara sturlun vegna þess að þetta er að þróast á þann veg að enginn veit hvað gerist næst. Það eru margir núna sem óttast um sinn hag og hvað gerist næst.“ Prófessor í Mið-Austurlandafræðum segir vísbendingar um að árásir Bandaríkjanna og Ísraels á Íran verði jafnstórt verkefni og innrásin í Írak 2003. Óljóst er hvað vakir fyrir Bandaríkjaforseta með aðgerðunum. Hættan núna að þetta breiðist út um Mið-Austurlönd Ófriðurinn hefur strax breiðst út til nærliggjandi landa. Íranir hafa gert hefndarárásir á nágrannalönd og sagt bandarískar herstöðvar þar skotmörk. Magnús Þorkell segir ómögulegt að spá fyrir um hvað næstu dagar beri í skauti sér. „Enda eru svo mörg ríki og margir hagsmunir þarna sem eru að berjast sín á milli. Hættan er núna, miðað við hvernig þetta var síðastliðið sumar, að þetta muni breiðast út og hafa áhrif sérstaklega á orkuverð, vöruflutninga, flugferðir milli Asíu og Evrópu og annars staðar. Þannig að þetta á eftir að breiðast út. Þetta verður ekki eins takmarkað eins og það var síðastliðið sumar. Enda eru kannski vísbendingar á lofti um að þetta geti verið jafnstórt verkefni og til dæmis 2003, þegar ráðist var inn í Írak.“ Íranska þjóðin vill fá að ákveða sína eigin framtíð, að opnað verði fyrir landið og efnahagsþvingunum aflétt. „Þannig að þau geti loksins farið að þróa áfram sína menningu og sinn efnahag. Það er kannski þeirra draumur, að þau geti lifað án afskipta eigin stjórnvalda og erlendra ríkja.“ „Mjög óljóst hvað í raun og veru vakir fyrir honum“ Trump bar ákvörðunina um árásirnar gegn Íran ekki undir bandaríska þingið. Fyrr í dag greindi bandaríski herinn frá því að þrír hermenn hafi fallið í aðgerðunum. Magnús Þorkell telur hann ekki hafa stuðning þjóðarinnar. „Alls ekki. Sérstaklega ekki meðal eigin stuðningsmanna. Vegna þess að hann komst meðal annars til valda og varð vinsæll vegna þess að hann vildi hætta þessari ævintýramennsku í Mið-Austurlöndum. Hann vildi fjárfesta í innviðum innan Bandaríkjanna frekar en að standa í svona stríðsrekstri. Þeir sjá ekki alveg hver tilgangurinn er með þessu og hvernig þetta mun aðstoða Bandaríkjamenn til þess að komast upp á næsta stig.“ Þessar aðgerðir séu ein leið fyrir Trump til að draga athygli frá því sem er að gerast innanlands og styrkja hans stöðu sem mikill valdhafi á alþjóðavettvangi. Þetta sé líka leið til að styðja Ísrael, helsta bandamann Bandaríkjanna, í hagsmunaleit ríkisins á svæðinu. „Það er mjög óljóst hvað í raun og veru vakir fyrir honum. Þetta tengist ekki neitt því sem hann hefur staðið fyrir fram að þessu. En hann heldur kannski að þetta verði auðvelt verkefni en þetta verður það svo sannarlega ekki. Þetta verður ekki stutt, þetta verður blóðugt, þetta verður mjög langt og flókið og eftirmálarnir gífurlegir.“