38 տարի առաջ՝ 1988 թվականիր փետրվարին, ծնվեց Շարժումը : Դա սոսկ քաղաքական իրադարձություն չէր, առավել եւս՝ տարածքային վեճ քանդվող գերտերության համատեքստում: Արցախյան շարժման հիմքում ազատության եւ ինքնաճանաչման ձգտումն էր, պայքարը սեփական ինքնության պահպանման համար: Սա է պատճառը, որ Շարժումը միավորեց մարդկանց՝ անկախ տարիքից, սեռից, զբաղմունքից կամ գտնվելու վայրից: Բազմամարդ ցույցեր էին ընթանում ինչպես Երեւանում, Ստեփանակերտում ու մարզային համայնքներում, այնպես էլ՝ հայաշատ խոշոր քաղաքներում, օրինակ՝ Մոսկվայում, որտեղի հայ համայնքը գործում էր շատ ակտիվ: Արցախյան շարժումը միասնության աննախադեպ օրինակ է, երբ գաղափարն ու նպատակը հաղթում է հնարավոր բոլոր «եթե»-ներն ու «բայց»-երը: Շարժում, որի հիմքում եղած «հանուն»-ը արտահայտվում է Մատենադարանում 1988-ին փակցված մեկ նախդասությամբ՝ «Ազատություն գերված Արցախին»: Մեդիամաքսը ներկայացնում է արխիվային ֆոտոշարք՝ 1988թ.-ի տարբեր ամիսներին Երեւանում, Ստեփանակերտում, Մոսկվայում ընթացող ցույցերից: Լուսանկարների հեղինակը Սուրեն Սարգսյանն է, որն այդ օրերին ուսանող լինելով՝ սիրողական տեսախցիկով արձանագրել է տեղի ունեցողը: