Vonskuveður sem geisaði á austanverðu landinu í gær er gengið yfir en íbúar á suðvesturhorninu geta búið sig undir hríðarveður. Gular viðvaranir hafa verið gefnar út á Suðurlandi og við Faxaflóa frá klukkan níu. Hvassviðri og snjókoma eða skafrenningur gætu valdið því að færð spillist, til dæmis á Hellisheiði, í Þrengslum, á Kjalarnesi og Snæfellsnesi. Veðrið ætti þó að mestu að vera gengið yfir um klukkan eitt eftir hádegi. Hægari vindur og úrkomulítið um landið norðaustanvert. Veðurspáin er svohljóðandi: Austan og suðaustan þrettán til tuttugu metrar á sekúndu sunnan- og vestantil og fer að snjóa þar upp úr hádegi, en rigning eða slydda síðdegis. Hægari vindur og úrkomulítið um landið norðaustanvert. Hlýnandi veður og hiti víða 0 til 8 stig síðdegis, hlýjast sunnan heiða. Snýst í sunnan og suðvestan átta til fimmtán í kvöld og nótt með éljum suðvestanlands, en birtir til norðaustantil. Hiti í kringum frostmark á morgun.