Atvinnuvegaráðherra varði lögmæti frumvarps um afturköllun kvótasetningar á grásleppu á fundi atvinnuveganefndar. Hún hyggst leyfa með reglugerð að net séu tekin upp í vondum veðrum. „Það skiptir auðvitað máli hvort verið er að afturkalla umdeilda kvótasetningu sem er ársgömul, er ekki byrjað að framselja réttindin og er sett án þess að fyrir því liggi ráðgjöf Hafrannsóknastofnunar í takt við áhyggjur af ofveiði aflans.“ sagði Hanna Katrín Friðriksson, atvinnuvegaráðherra á opnum fundi atvinnuveganefndar Alþingis í morgun, um frumvarp um afturköllun kvótasetningar á grásleppu. Ráðherra sagðist ekki geta útilokað að kvótahafar myndu leita réttar síns. Hins vegar geti þeir enn veitt þó snúið sé aftur í sóknarkerfi. „Þeir munu þá fá sömu réttindi og aðrir sem voru útilokaðir með þessari kvótasetningu fyrir tveimur árum,“ Þingmenn minnihlutans kröfðu ráðherra svara um hvort frumvarpið stæðist stjórnarskrá og vísuðu til orða starfsmanns ráðuneytis. Hanna Katrín segir starfsfólk hafa svarað þegar purt var um afstöðu: „Afstaðan er sú, það þarf að vera tryggt að þessi skoðun hafi farið fram. Svar meirihlutans: Það hefur verið gert.“ Ráðherra var spurð hvort sjálfbærnivottanir væru í hættu. Hún benti á að meðafli hefði minnkað og ákveðnir stofnar tekið við sér. Þá hefðu Grænlendingar haldið sínum vottunum innan sóknardagakerfis. Hún bendir á að ráðuneytið hyggist með reglugerð gefa leyfi til ða taka upp net ef svo ber undir sem minnkar hættu á meðafla. Aðspurð um hvort veiðistjórnunarkerfi hafi áhrif á verð á mörkuðum benti Hanna Katrín á að meðalverð árið 2024 hafi verið hærra en í fyrra þegar veitt var eftir kvóta. „Útfærsla veiðistjórnarkerfisins er í besta falli bara einn þáttur af mörgum sem ákvarða með verðið ,“ segir Hanna Katrín.