Febrúar var óvenju kaldur en um leið var óvenju lítið um illviðri miðað við árstíma. Þurrt var lengst af í nær öllum landshlutum nema Austurlandi þar sem úrkoma var í meðallagi. Óvenju þurrt og sólríkt var á sunnan- og vestanverðu landinu en þó brast á með snjókomu þar undir lok mánaðar. Þetta kemur fram í yfirliti Veðurstofu Íslands um tíðarfar í febrúar. Úti var kalt og líklega hafa margir kynt hús sín meira en þeir eru vanir. Akureyringar máttu búa við 2,9 stiga frost að meðaltali í febrúar, það er 2,4 stigum meira en þeir hafa mátt venjast síðasta áratuginn. Reykvíkingar máttu einnig þola óvenju kaldan febrúar. Hitastigið var að meðaltali 0,8 stigum undir frostmarki en þeir hafa vanist eins stigs hita að meðaltali í febrúar síðasta áratuginn. Þetta voru engar undantekningar því í bæjum vítt og breitt um landið var frostið meira en venja er til. Það átti reyndar líka við á hálendinu. Frostið á Hveravöllum var að meðaltali 8,6 stig, 3,6 stigum meira en nemur meðaltali síðasta áratugar. Mikill þurrkur var um mestallt land fyrstu tvo mánuði ársins. Aðeins Austfirðingar áttu því að venjast að þar væri úrkoma. Þurrkatíðinni á Suður- og Vesturlandi lauk ekki fyrr en 23. febrúar. Febrúar var óvenjusnjóléttur framan af mánuði en þó olli hríðarveður samgöngutruflunum við suður- og suðausturströndina 18. febrúar og næstu daga á eftir. Miklir gróðureldar urðu í útjaðri Kópavogs 22. febrúar en rúmum sólarhring síðar byrjaði að snjóa á höfuðborgarsvæðinu. Nýliðinn mánuður var sá sjötti sólríkasti febrúarmánuður sem Reykvíkingar hafa upplifað síðan mælingar hófust 1911. Rólegheitaveður var víðar því á fjölda sjálfvirkra veðurstöðva mældist minnsti meðalvindur í febrúar frá upphafi á þeim stöðvum. Austanáttirnar voru óvenju lífseigar og ollu meðal annars stórfelldum breytingum í Reynisfjöru.